Тымныы полюһугар Кыайыы Знамятын көрүстүлэр

Ааспыт нэдиэлэҕэ Кыайыы Знамята Томпоттон Өймөкөөҥҥө аҕалыллыбыта. Тымныы полюһугар хас сэлиэнньэ аайы Улуу Кыайыы Знамятын үөрүүлээх быһыыга-майгыга көрсүһүүгэ тыыл бэтэрээннэрэ, үөрэнээччилэр, уопсастыбаннас актыыбынайдык кытыннылар. Оҕолор байыаннай тиэмэҕэ ырыа ыллаатылар, хоһоон аахтылар.


Н.М. Заболоцкай-Чысхаан аатынан Томтор орто оскуолатын литературнай-кыраайы үөрэтэр музейын салайааччыта Мария Боярова, оҕо спортивнай оскуолатын дириэктэрэ Владимир Березкин, бэтэрээннэр ааттарыттан «Арчы» кырдьаҕастар кулууптарын салайааччыта, СӨ култууратын туйгуна Роза Готовцева эҕэрдэ тыл эттилэр.

Сордонноох нэһилиэгэр тыыл бэтэрээнэ Петр Дмитриевич Иванов, Төрүт нэһилиэгэр үлэ фронун бэтэрээнэ, 83 саастаах Аксинья Иннокентьевна Егорова тыл этиилэрин мустубут дьон иһийэн туран иһиттилэр.
Өймөкөөҥҥө 80-нун ааспыт үлэ, тыыл бэтэрээнэ Гаврил Семенович Винокуров эҕэрдэ тыл этэн баран, Кыайыы Знамятын муннугуттан сыллаан ылан үгүс киһини уйадытта.
Үчүгэй нэһилиэгэр оскуолаҕа киириэн иннинээҕи саастаах оҕолортон саҕалаан нэһилиэк дьоно-сэргэтэ бүтүннүү бу өрөспүүбүлүкэтээҕи эстафетаҕа көхтөөхтүк кытынна. Олохтоох библиотекаҕа сэрии сылларыгар анаммыт кинигэ быыстапкатын тэрийдилэр.