Мунньахха правительство вице-премьерэ Петр Алексеев, республика баһылыгын уонна правительствотын дьаһалтатын баһылыга  Юрий Куприянов, министиэристибэлэр уонна биэдэмистэбэлэр салайааччылара, Чурапчы улууһун баһылыга Андрей Ноговицын, улуус нэһилиэктэрин баһылыктара, уо. д.а кытыннылар.

Чурапчы улууһугар тыа хаһаайыстыбатын бородууксуйатын оҥорон таһаарааччылар бу эйгэни сүрүннүүр министиэристибэни кытта ыкса ситимнээхтик уонна хардарыта дьайсыылаахтык үлэлииллэр. Тыа хаһаайыстыбатын уонна ас-үөл политикатын миниистирэ Иван Слепцов ити түмүгэр улахан кыһалҕа суоҕун, оттон үөскээбит кыһалҕа тута, кэмигэр быһаарылларын бэлиэтээн эттэ. Тахсар ороскуот, инвестиционнай бырагыраама үбүлэнэр. Онтон да атын тэрээһиннэр, миэрэлэр кэмигэр ыытыллаллар уонна ылыллаллар.

Предпринмательство, туризм министиэристибэтэ улууска өрө тахсыылаахтык үлэлиир. Миниистир  Екатерина Кормилицына  этэринэн, промышленнай-производственнай агрокластердар үлэлииллэр. Бүгүҥҥү туругунан 12 агрокластер бырайыактааһыҥҥа киирбит. 9 - түмүктэнэн эрэр. Министиэристибэ улуус дьаһалтатын кытта тимири уһаарар сыаҕы, атыы-эргиэн киинин, доруобуйаларыгар хаарчахтаах оҕолорго анаммыт оҕо садын тутууга үлэлэһэр.

Доруобуйа харыстабылын миниистирэ  Александр Горохов оройуоннааҕы киин балыыһа иккис уочаратын, акушердаах-фельдшердаах икки пууну, Дириҥҥэ учаастактааҕы балыыһаны тутуу тустарынан кэпсээтэ.

Промышленность миниистирэ  Андрей Панов илин эҥэр улуустарыгар саамай сытыырхайан турар гаастааһын боппуруостарыгар тохтоото. Кини этэринэн, 2014 сылга 1 млрд 752 мөл. солк. көрүллүбүтүн эттэ. Майа – Табаҕа – Чурапчы хайысханан магистарльнай газ турбатын тардыы бу үп-харчы суотугар былааннанар. Үлэ барыта 2015 сылга түмүктэниэхтээх.

Киирбит ыйытыкка хоруй быһыытынан тырааныспар уонна суол хаһаайыстыбатын миниистирэ Семен Винокуров мотуор уматыгар кубулуйар кыахтаах сжиженнай гааһы оҥорон таһаарыыга анал бырагыраама оҥоһулларын, ити бастаан утаа Дьокуускайга, ол кэнниттэн улуустарга туттуллуоҕун эттэ. Компримированнай гааһы оҥорон таһаарыыга тыа хаһаайыстыбатын министиэристибэтэ ылсан үлэлиир. Нам, Хаҥалас уонна Горнай улуустарыгар ити газ туһаныллыаҕа.

Семен Винокуров Чурапчы улууһугар суолу өрөмүөннээһиҥҥэ анаммыт үлэ тула элбэҕи кэпсээтэ. 2014 сылга олохтоох суоллары өрөмүөннээһиҥҥэ республика бюджетыттан 40 мөл. солк., 30 мөл. солк. суол фондатыттан көрүллүбүт. Оттон мунициапльнай оройуон бюджетыгар 24 мөл. солк. бэриллибит. 2014 сылга федеральнай уонна республикатааҕы суолга элбэх үлэ былааннанар.

Чурапчы улууһун баһылыга  Андрей Ноговицын тыҥаан турар кыһалҕалар, чөл олоҕу тарҕатыы тустарынан сиһилии кэпсээтэ.

 Егор Борисов мунньах бүтүүтэ улахан куораттарга, улуус кииннэригэр уопсай практика быраастарын кабинеттарын тэрийэр наадатын эттэ. Сжиженнай гааһы оҥорон таһаарыыга сыһыаннаан Егор Афанасьевич бу мотуор уматыгар эрэ анаан буолбакка, газ турбата тиийбэт сирдэригэр ититиигэ туһанар наадалааҕын ойуччу тутан бэлиэтээтэ.

Таатта улууһун уонна Уус-Алдан Бороҕонун гаастааһыҥҥа эбии үп-харчы булар туһунан правительство чилиэннэрэ толкуйдуулларыгар эттэ. «Инникитин Амма, Таатта, Уус-Алдан, Горнай улуустарыгар гааһы киллэрии, Бүлүү бөлөх улуустарга гаастааһын үлэтин түмүктүүр туһунан бүгүн толкуйдуохтаахпыт», - диэтэ Егор Борисов.

Мунньах бүтүүтэ тыа хаһаайыстыбатын бородууксуйатын оҥорон таһаарааччыларга уонна олохтоох дьаһалтаҕа ыһыы уонна аһылыгы бэлэмниир компания кэмигэр күүһү-кыаҕы түмэр суолтатын Егор Борисов бэлиэтээтэ.