Күммүт-дьылбыт сыллата уларыйа турарыттан, чопчу билгэлээһини оҥорор уустук. Кэлиҥҥи сыллары ылан көрдөххө, өрөспүүбүлүкэ соҕуруу өттүгэр өрүс мууһа ыам ыйын бастакы декадатыгар, киин улуустарга ортотугар уонна хоту улуустарга ыам ыйын бүтүүтэ хамсыыр. Быйыл Өлүөнэ өрүскэ көмүөл Өлүөхүмэнэн 9-11, оттон Дьокуускай куорат аннынан 13-15 күннэригэр ааһыаҕын Гидрометеосулууспа үлэһиттэрэ билгэлииллэр. Оттон Алдан, Амма, Бүлүү өрүстэригэр 3-7 хонугунан эрдэлээн устар туруктаахтар.

Хоту өрүстэргэ быйыл муус эмиэ эрдэ устар чинчилээх. Халымаҕа уу таһыма нуорматтан 0,4–1,2 м үрдээн, Зырянка бөһүөлэгэ уонна Орто Халыма куората ууга барар кутталлааҕын РФ Ыксаллаах быһыыга-майгыга министиэристибэтин Саха сиринээҕи управлениета иһитиннэрдэ.

Быйыл муус улаханнык халыҥаабата. Муус устар саҥатыгар ыытыллыбыт кээмэйдээһин көрдөрбүтүнэн, өрөспүүбүлүкэ өрүстэрин мууһун халыҥа ортотунан нуорматтан 1–57 см чараас. Арай Алдаҥҥа Томмот аннынан уонна Бүлүү аллараа сүүрээнинэн нуорматтан 5–16 см халыҥ. Өлүөнэ өрүс мууһа бүгүҥҥү туругунан Табаҕа аннынан 112 см, Ленскэй куоратынан 113 см, Өлүөхүмэҕэ 81 см, Покровскайга 103 см, Дьокуускайга 110 см, Сангаарга – 130 см, Эдьигээҥҥэ – 127 см, Күһүүргэ – 160 см.

Муус харыыта Өлүөнэҕэ Ленскэй улууһугар, Дьокуускай аннынан, Нам, Кэбээйи улуустарыгар уонна Халыма өрүскэ тахсыан сөп. Бу барыта ыам ыйдааҕы гидрометерологическай туруктан быһаччы тутулуктаах. РФ Ыксаллаах быһыыга-майгыга министиэристибэтин Саха сиринээҕи управлениета Амма, Таатта уонна Бүлүү өрүстэригэр муус харыыта тахсыан, итиэннэ Таатта, Амма, Чурапчы улуустарыгар кэлэр ыйга халлаан эрдэ сылыйдаҕына, гидротехническэй сооружениелар халаанныахтарын сөбүн этэллэр.

Ааспыт сылга өрөспүүбүлүкэ 8 улууһугар харыы тахсыан сөптөөх сирдэригэр мууһу кэбирэтэр үлэлэр ыытыллыбыттара. Быйыл эмиэ оннук үлэ ыытыллан бүтэн эрэр. Мууһу кэбирэтиигэ Россия Ыксаллаах быһыыга-майгыга министиэристибэтин института бигэргэппит ньымаларын туһанан хараардыы, кыдьымаҕы ыраастааһын, мууһу ромбалыы эрбээһин үлэтэ ыытылынна. Бу улахан кэлим муус алдьаныытыгар ордук көдьүүстээҕэ быһаарыллан турар. Ол курдук Өлүөнэ сүнньүнээҕи ууга управление Өлүөнэ уонна Халыма өрүстэригэр 46 учаастакка мууһу кэбирэтиини уонна 465 гектар сирихараардыыны түмүктээн эрэр.

Өлүөнэҕэ көмүөл хаһан устуой? (Сабаҕалааһын)

Пуун            2014 с.       2015 с.

Витим         24.04          01.05

Ленскэй      28.04          06.05

Өлүөхүмэ    01.05         09.05

Дьокуускай 08.05         14.05

Эдьигээн      19.05         24.05