Биһиги улууспутуттан Шадрин Александр уолунаан Александрдыын (Нам), Захаров Руслан уонна Семенов Валерий (Хамаҕатта), Аргунов Василий уолунаан Василийдыын (Модут), Петров Роман, Румянцев Иван (Нам) уонна Михайлов Василий, Шадрин Дмитрий (Нам) ситиһиилээхтик кытыннылар.

Икки күннээх күрэстэһии түмүгүнэн Степанов Егор, Андреев Алексей - («Кыыс Бэргэн», Дьокуускай) - бастакы, Охлопков Максим, Баянитов Адам - («Победитель», Дьокуускай) — иккис, Шадрин Александр уолунаан Александрдыын - («Ийээ, мин эргиллиэм», Нам улууһа) - үһүс, Василий Аргунов уолунаан Василийдыын - («Ретро», Нам улууһа) - төрдүс миэстэлэри ыллылар.

Захаров Руслан уонна Семенов Валерий (Нам), Максимов Герасим уонна Михайлов Август (Ньурба), Максимов Дмитрий уонна Дягилев Алексей (Ньурба, Сунтаар), Петров Роман уонна Румянцев Иван (Нам), Михайлов Вячеслав уонна Акимов Иннокентий (Горнай, Бүлүү), Марков Дьулус уонна Прокопьев Адам (Мэҥэ-Хаҥалас), Михайлов Василий уонна Шадрин Дмитрий (Нам), Петров Николай уонна Иннокентьев Семен (Дьокуускай) анал ааттарга тиксэннэр биһирэннилэр.

Хас биирдии кыттааччы сибиэһэй салгыҥҥа сылдьан, бэйэтин дьоҕурун дьоҥҥо-сэргэҕэ көрдөрөн, олохтоохтор биһирэбиллэрин ылан олус астынан, дуоһуйан барда. Кыттааччы Аргунов Василий санаатын бу курдук үллэстэр: «Хамаҕатталар бу курдук үрдүк таһымнаах күрэҕи иккис сылын тэрийдилэр. Мууһунан дьарыктаммытым хас да сыл буолла. Бу күрэхтэһиигэ Намнааҕы педколледжка үөрэнэр уолбунаан кытта сылдьабыт. Байкалга, Магадаҥҥа, республикабытыгар ыытыллар араас таһымнаах күрэстэргэ куруутун кыттабыт. Муус - олус үчүгэй скульптурнай матырыйаал. Тугу барытын оҥоруохха сөп дии саныыбын».

Олохтоохтор нэдиэлэ устата куоластаан биир бастыҥ үлэни быһаарыахтара. Кыайыылаахтар «Көрөөччү биһирэбилэ» анал аакка тиксэн, убаһанан бириэмийэлэниэхтэрэ.