Саха сирин баһылыгын эбээһинэһин быстах кэмҥэ толорооччу  Егор Борисов уу иэдээнигэр түбэспит улууска от ыйын 12 күнүгэр сылдьыбыта уонна нэһилиэнньэлээх пууннарга куттал суох буолуутун, үбүнэн-харчынан өйүүргэ сорудахтаабыта.

Егор Борисов хоромньу кээмэйин ааҕыыны түргэнник оҥорорго, бырабыыталыстыба ууга былдьаммыт малы-салы, баайы-дуолу толуйарын, дьиэлэри өрөмүөннүүрүн, суоллары оҥорорун, тыа хаһаайыстыбатын үлэтигэр көмөлөһөрүн модьуйбута.

Бүгүҥҥү туругунан 238 дьиэ кэргэҥҥэ тутуу матырыйаала көмө быһыытынан бэриллиэҕэ. Ити дьон ахсааныгар 866 киһилээх 215 олорор дьиэ эбии испииһэгин бэлэмнээтилэр. Дьабыл-Чурапчы хайысханан массыына суолугар Таатта үрэҕи туоруур пантоннай (быстах кэмнээх) муоста туруоруллубута. Одьулууҥҥа диэри тиэхиньикэ сырыыта хааччылынна.

От ыйыгар Чурпчы Одьулуун, Чакыр, 1-кы, 2-с Харбала нэһилиэктэрин 58 эбийиэгэ, ол иһигэр массыына суолун 30 учаастага, 7 муоста, элбэх квартиралаах 3 дьиэ, социальнай суолталаах 8 эбийиэк, АТС станцията, 2 музей, ветеринария, почта дьиэлэрэ ууттан эмсэҕэллээбиттэрэ.