«Дэлбүргэ» ыраастаныы, уокка сүгүрүйүү, табаны аһатыы сиэрэ-туома ыытыллыаҕа. Айылҕа уһуктуутун уруйдуур-айхаллыыр былыргы ырыаны ыллыахтара, үгэс буолбут «Һээдьэни» үҥкүүлүхтэрэ. Сиэри-туому толорууга кэлбит дьон айылҕа иччититтэн ситиһиини, дьолу-соргуну көрдөһүөхтэрэ», - диэн тэрийээччилэр СИА-ҕа эттилэр.

Кырдьаҕастар сиэр-туом аһынан табаны аһатыахтара, ыччат «Айынчан» ырыаны ыллыаҕа.

«Бу кэнниттэн оонньуу-көр саҕаланыаҕа. Үгэскэ кубулуйбут «Ечэмэчэк», «Орам дьавдяк», «Дакламкин» оонньууларга ыччат дьону-сэргэни ыҥырыаҕа.

Оонньуу кэнниттэн кырдьаҕастар эдэрдэри бырааһынньыктааҕы остуолга ыҥырыахтара. Эбээн норуотун туһунан түҥ былыргы номохтору кэпсиэхтэрэ. Төрөөбүт төрүт тылы төһө билэллэригэр куонкурус буолуоҕа, кыайыылаахтары эҕэрдэлээһининэн, бэлэҕи туттарыынан тэрээһин түмүктэниэҕэ.

Бу сэргэх тэрээһини АГИИК Арктика норуоттарын фольклорун уонна этнокультуратын кафедратын уһуйааччыта, СР Культуратын туйгуна, РФ уопсай үөрэхтээһинин бочуоттаах үлэһитэ  Зинаида Никулина, искусствоведение наукатын кандидата, АГИИК Арктика норуоттарын фольклор уонна этнокультура кафедратын доцена Парасковья Заболоцкая иилээн-саҕалаан ыытыахтара. «Долгунча» ансамбль, о.д.а. тэрээһиҥҥэ кыттыахтара.