Дьокуускай куораттан, чугастыы сытар улуустартан, ыҥырыылаах ыалдьыттар тоҕуоруһан муһуннулар. Президуим састаабыгар СӨ транспорга уонна суолга хаһаайыстыбатын миниистирэ Семен Винокуров, Ил Түмэн депутата Александр Корякин, СӨ Ил Дарханын уонна бырабыытылыстыбатын дьаһалтатыттан Александр Софронов, Уус- Алдан улууһун баһылыга Алексей Федотов, Дьокуускай куорат дьаһалтатыттан Георгий Михайлов, Амма улууһугар баһылыгынан үлэлээбит Дмитрий Наумов, Василий Пахомов уо.д.а бааллар.

Николай Архипов улуус дьонугар быыбарга көхтөөх кыттыыны ылбыттарыгар махтанна уонна: “Амма улууһун сайдыытын туһугар дьоһуннаахтык үлэлиэм, улуус баһылыгын дуоһунаһын чиэстээхтик толоруом,” - диэн андаҕар тылын эттэ.

Амма улууһун дьокутааттарын Сэбиэтин бэрэссэдээтэлэ Алексей Карманов киниэхэ дохсун ытыс тыаһын ортотугар улуус баһылыгын бэлиэтин моонньугар кэтэртэ. Саҥа талыллыбыт баһылыгы улууһун дьонун үрдүк итэҕэлин ылбытынан бэрт элбэх киһи эҕэрдэлээтэ.

CӨ Ил Дархана Егор Борисов Амма улууһун баһылыгар Николай Архиповка эҕэрдэ суругун СӨ транспорга уонна суолга хаһаайыстыбатын миниистирэ Семен Винокуров ааҕан иһитиннэрдэ уонна СӨ бырабыытылыстыбатын аатыттан, тус бэйэтин аатыттан истиҥник эҕэрдэлээтэ. Итиэннэ Семен Викторович “Суол олох төрдө, хорук тымыра” диэн туран Амма суола Охотскай муораҕа тахсар инники кэскиллээх бырайыак-картатын Николай Архиповичка туттарда.

Уус-Алдан улууһун баһылыга Алексей Федотов, улууһун дьонун-сэргэтин аатыттан Николай Архиповка эҕэрдэтин тиэртэ. Амма улууһа Саха сирин дьоно үөрүүлэрин туһугар үүнэ-сайда турдун диэн алҕаата. Баһылык үлэтигэр, тулууру, дьулууру уонна өтө көрүүнү баҕарда.

Ил Түмэн төрдүс ыҥырыылаах Сэбиэтин дьокутаата, Амма улууһугар 1995-2000 сс. баһылыгынан үлэлээбит Дмитрий Наумов, Амма улууһун кырдьаҕас кулубаларын аатыттан Николай Архиповы истиҥник эҕэрдэлээтэ, баһылык эппиэттээх үлэтигэр ситиһиилээри баҕарда. Түмүгэр Дмитрий Федосеевич Амма улууһун дьонун саҥа талыллыбыт баһылык тула түмсэн, сомоҕолоһон улуус инники сайдыытын туһугар күүстэрэ кыайарынан үлэлииллэригэр ыҥырда.