Манна эбиитин уот-күөс таба туһаныллыбыт, ынах маҕырааһына, төрүүрэ бэрткэ табыллан ойууланна. Оруолларга: дьиэлээх эмээхсин –  Анна Аржакова, эһээлэрэ – Иннокентий Птицын, кийиит – Марфа Шишигина, эмээхсин дьүөгэтэ – Евдокия Платонова бэйэлэрин оруолларын кыайа – хото оонньоотулар. Көрөөччүлэргэ  уоһах, малааһын алаадьытын бу сыанаҕа реквизиты таба туһанан буһаран, күндүлээн  дьон сэҥээриитин ыллылар.

IΙ чааһа. Улуу бөлөһүөк, киһи аймах дьылҕатын өтө көрөр, Саха сирин наукаларын сайдыытыгар сүҥкэн кылааты киллэрсибит, учуонай суруйааччы, чинчийээччи  Өксөкүлээх Өлөксөй – А.Е. Кулаковскай хаан удьуорун быһаччы салҕааччы уолун Реас Алексеевич Кулаковскай төрөөбүтэ 100 сыла туолуутугар ананан  «Алгыс» тылынан уруйданна. Тойугунан ситэрдэ V Аан дойдутааҕы Калмыкияҕа Элиста куоракка ыытыллыбыт  «Эпосы мира на земле потомков Джангара» бэстибээл кыттыылааҕа. «Олоҥхо дойдутун оҕотобун» республикатааҕы фестиваль Гран-при хаһаайына, эдэр ыччат уонна студеннар  «Муҥха олоҥхотун» кыайыылааҕа Айсен Федоров.  

Дьэ, доҕотоор! Саха киhитин саныыр санаатын сайа эппит Ойуунускай убайбыт отут үс олоҥхоттон уhааран оҥорбут тиит төргүү мутугунан тэбэр тураҕас аттаах  «Дьулуруйар Ньургун Боотур» олоҥхоттон быhа тардыыны толордулар: 34 сыл устата Тойук Уруйдан, Улуу Олоҥхо» республиканскай бэстибээл бастакы истиэпэннээх лауреаттара. Ньургун Боотур, Үрүҥ Уолан - Иннокентий Птицын, Туналҕаннаах ньуурдаах Туйаарыма Куо – Екатерина Новикова, Сабыйа Баай хотун – Марфа Шишигина, Айыы Умсуур удаҕан – Сардаана Дакаярова, Кыыс Ньургун – Мария Оконешникова, Кыскыйдаан Куо – Любовь Платонова, Аан Алахчын – Евдокия Платонова, Аал Луук Мас – Клара Дегтярева, Айыыһыт алгыһа – Анна Аржакова.

Онтон салгыы 34 сыл устата «Тойук» ансаамбылга ыллаан-туойан кэлбит  устар ууну сомоҕолуур уус-уран тыллаах тойуксуттара, хомуһуннаах хоһоонноохторо,  оһуохайдьыттара, сир түннүктэрэ – сээркээн сэһэнньиттэрэ-олоҥхоһуттара, норуот талааннаахтара  Ульяна Романова, Мария Саввинова, Владимир Данилов,  Екатерина Бурцева,Александра Романова,  Татьяна Макарова бэйэлэрин талааннарын көрөөччү дьүүлүгэр таһаардылар

Тойукка киирбит хас биирдии норуот талааннаахтара дуоһуйа, ис сүрэхтэриттэн дьарыктаналлар. Ол курдук, тойуктууллар, хомустууллар, былыргы, норуот ырыаларын ыллыырга үөрэнэллэр, олоҥхону толороллор, оhуохайдыыллар  уонна да атын кыра жанрдарга холоноллор.

«Тойук» ансаамбыл ыччаты духуобунай өттүнэн иитиигэ ураты суолтатын бэлиэтиэҕи баҕарыллар. Ансаамбыл ураты суолтатын элбэх араас бэстибээллэргэ, көрүүлэргэ, олоҥхо декадаларыгар кыттыыта туоһулуур. Бу  «Тойук» кэлэктиибин  Гаврил Софронов, Надежда Толбонова салайааччылардаах, Өрөспүүбүлүкэтээҕи норуот айымньытын дьиэтин фольклорга методиһа Мария Евсеева иилээн-саҕалаан атаҕар туруорбута. Кини кэнниттэн Елена Варламова, Зоя Сысолятина хас да сыл үлэлэппиттэрэ. Кэнники сылларга, сүүрбэ сыл  Галина Федорова таһаарыылаахтык үлэлэппитэ. Кэлин Өксөкүлээх Өлөксөй аатынан култуура Киинин  айар кэлэктиибигэр киирэн эдэр талааннаах уһуйааччыларга Амгаяна Николаева, Екатерина Григорьева, Дмитрий Иванов, Валентин Исаков, Михаил Винокуров илиилэригэр киирэн үгүс улуустарга сылдьан ыһыах сиэрин-туомун ситэрэн, олонхо ыһыахтарыгар кыттан дьон-сэргэ махталын ылбыта. Быйылгаттан «Тойук» ансаамбыл салайаачытынан саха сиригэр фольклор сайдыытыгар бары кыһамньытын уурбут эдэр олоҥхоһут Айсен Федоров ананан үлэлии сылдьар.