Бу дьоро түгэнинэн сибээстээн, Саха Национальнай библиотекатын историческай саалатыгар Дмитрий Наумов айар үлэтин кэрэхсээччилэр, ааҕааччылар, театр уонна наука үлэһиттэрэ, суруналыыстар суруйааччыны кытта көрсүһүүгэ автор тыа сирин туһунан айымньыларын тула санааларын атастастылар.

Дмитрий Наумов ааҕааччылардыын көрсүһүүтүн аһарыгар айар үлэнэн хаһааҥҥыттан дьарыктанар буолбутун билиһиннэрдэ. Ол курдук уини аҕа кыннын, поэт Петр Тобуруокап туһунан аан бастакы ыстатыйатын суруйбутун Михаил Алексеев-Дапсы саха радиотыгар тыл туһунан анал биэриитигэр биир илиискэ икки тылы сыыһа туттубут диэн кириитикэлээбитэ туһалаах буолбутун, правительствоҕа бырааһынньык кэмигэр телефоҥҥа дьуһуурустубалыыр иллэҥ кэмнэригэр бастакы лоскуй кэпсээннэрин суруйбутун туһунан аҕынна. Прозаик, драматург итинтэн ыла айар үлэ абылаҥар сыыйа киирбитин бэлиэтээтэ. “Мин дьоллоох киһибин. Үлэни барытын алларааттан саҕалаабытым. Билигин үлэттэн, политикаттан бардым. Билигин мин көҥүл, айар суолга туруннум”, -- диэтэ Дмитрий Наумов.

Литературнай критик, филологическай наука доктора Варвара Окорокова Дмитрий Наумов айымньыларын сүрүн тематынан тыа сирин олоҕо, дьоно-сэргэтэ буоларын ыйда. “Автор айымньыларыгар олоҕу, тыа сирин, тыа дьонун таптыыра-сэргиирэ көстөр. Кэпсээннэр ортолоругар кылгас анекдот кэпсээннэр эмиэ бааллар. Хачыгаар суолталаах да буоллар, испэт хачыгаары булар уустук. Биир бастыҥ хачыгаардара аны үлэлиир эрэ күнүгэр иһэн саҕалыыр, өрөбүлгэр иһиэҥ этэ диэтэхтэринэ, өрөбүлбэр баҕас сынньанар бырааптаахпын диир. Ити курдук суруйааччы сатирата күүстээх”, -- диэн туран, Варвара Окорокова автор сытыы кылыс тыллааҕын, кини геройдара саҥаран-иҥэрэн, хамсаан-имсээн ааҕааччы иннигэр илэ арыллан кэлэллэрин, тыа сирин олоҕун, үлэһит дьонун бу курдук тапталлаахтык ойуулаан-дьүһүннээн кэпсиир билиҥҥи кэмҥэ соҕотох ураты буочардаах суруйааччы буоларын бэлиэтээтэ.

Ил Түмэн V ыҥырыытын депутата Алексей Филиппов, парламент I уонна II ыҥырыыларын депутата Анатолий Гольдман, библиотекаҕа мустубут литератураны кэрэхсээччилэр, ааҕааччылар Дмитрий Наумовка айар үлэнэн утумнаахтык ылсан дьарыктанарыгар, суруйааччы быһыытынан тахсыылаахтык үлэлииригэр алгыстарын эттилэр.

Бу күн Үүнэр көлүөнэ театрыгар Дмитрий Наумов айымньыларынан туруорууларга ыытыллыбыт республикатааҕы аһаҕас күрэх түмүктэннэ. Күрэх кыайыылааҕынан Сунтаардааҕы народнай театр ааттанан, гран-при хаһаайынынан буолла. Иккис миэстэҕэ Амма улууһун Алтан народнай театра, үһүскэ -- Хатас коллектива таҕыстылар. Республика Ил Түмэнигэр сэтинньи 22 күнүгэр парламент IV ыҥырыытын депутатын Дмитрий Федосеевич Наумовы норуот депутаттарын итиэннэ общественность үөрүүлээх мунньаҕар чиэстиэхтэрэ.