Көрсүһүүгэ сүрүн иһитиннэрээччинэн тыа хаһаайыстыбатын уонна аска-үөлгэ политикатын миниистирин бастакы солбуйааччыта Николай Попов буолла, кини салаа сүрүн тэрээһиннэрин туһунан кэпсээтэ. Кини этэринэн, региоҥҥа тыа хаһаайыстыбатын сайдыытын политиката түөрт хайысханан ыытыллар, 16 бырайыак (программа) баар: тыа сирин территориятын инфраструктуратын сайдыыта, олорор дьиэни тутууга государство өйөбүллэрин тоҕоостоох хамсатыыларын киллэрии, хотоннору газификациялааһын, электрификациялааһын, кадрдары бэлэмнээһин уонна аттаран туруоруу, саҕалаан эрэр хаһаайыстыбалары өйөөһүн, толуйуу фондатын тэрийии уонна да атын элбэх.

Кулууп кыттыылаахтара сүрүн болҕомтолорун тыа сирэ оҥорон таһаарар бородууксуйатыгар: киэҥ туһанааччыга аналаах эккэ, үүккэ, туһаайдылар. «Саха ынаҕын, убаһатын, табатын этэ, үүтэ — бу экологическэй ыраас астар. Итилэр — бэйэлэрэ республика брендэрэ, өбүгэлэрбит историческай дьарыктара буолаллар, онон государство олору өйүөхтээх», - диэн санаатын эттэ Хотугулуу-Илиҥҥи федеральнай университет баһылыыр научнай үлэһитэ, экономическай наука кандидата, бэйэтэ ааттанарынан, учуонай-креативщик, Дуолан Андреев. Холобур быһыытынан кини Японияҕа дьоппуон крестьяннара олордубут, төрүт олохтоох дьон дьарыктанар ристэрэ атын дойду киэниттэн быдан ыараханнык сыаналанарын кэпсээтэ.

«Тыа сирин сайдыытыгар үп сиртэн хостонор баайы атыылааһынтан киириэхтээх», - дии саныыр ХИФУ Финансовай-экономическэй институтун профессора Николай Тихонов. «Биһиги олус баай дойдуга олоробут. Республикаҕа киирэр үп сиртэн хостонор туһалаах баайтан киирэр. Сылга итинтэн киирэр үп 500 трлн солкуобайга тэҥнэһэрОл эрээри Саха сиригэр итинтэн аҕыйах тиксэр, барыта федеральнай кииҥҥэ барар. Онон «Сир хостнор баай туһунан» сокуоҥҥа уларытыылары киллэриэххэ наада, кэнники сылларга мин итинэн дьарыктанабын, уонна барыгытын ыҥырабын», - диэтэ кини.

Мөккүөр түмүгүнэн мустубут дьону сэҥээрдибит тыа хаһаайыстыбатын сайыннарыы уонна тупсарыы кэккэ боппуруостарын туспа теманан ырытыахха диэн быһаардылар.

Көрсүһүүгэ Дьокуускайдааҕы государственнай тыа хаһаайыстыбатын академиятын экономическэй факультетын уонна М.К. Аммосов аатынан Хотугулуу-Илиҥҥи федеральнай университет Финансовай-экономическэй институтун студеннара кытыннылар.