РФ Бырабыыталыстыбатын бэрэссэдээтэлин солбуйааччы Александр Хлопонин селекторнай мунньахха: «Хакасияҕа, Забайкальеҕа уонна Амур уобалаһыгар буолбут баһаардар дьон дьалаҕай сыһыаннарыттан таҕыстылар», – диэн этэн туран, өртөөһүнү олохтоох былаастар кытаанах хонтуруолга ылыахтаахтарын ыйда. Бүгүҥҥү күҥҥэ баар баһаардар дойду салалтатын быһаччы хонтуруолугар киирдилэр.

2013-2014 сс. ойуур баһаарын умуруорууга тахсыбыт ороскуоту сабар туһунан боппуруос федеральнай таһымҥа быһаарылынна. Ойуурга баһаартан куттал суох буолуутун хааччыйыыга федеральнай бүддьүөттэн 4,5 млрд солк. көрүлүннэ, 5 тыһ. анал тиэхиньикэ атыылаһылынна.

Былырыын Саха сиригэр 1,2 мөл. гектар иэннээх ойуур уокка былдьаммыта. Быйылгы сезоҥҥа ойуур баһаарын умуруорууга өрөспүүбүлүкэ бүддьүөтүттэн 274 мөл. солк. көрүллүбүт. Баһаары утары барыта 15 тыһ. киһи, 165 парашютис-десантник, баһаар уотун кэтээн көрүүгэ 25 летчик, үлэлииргэ бэлэмин, онно 2400 анал тиэхиньикэ туһаныллыаҕын туһунан селекторнай мунньахха эттилэр.