Руслан Святославович ОДьКХ-гар уонна РЭС-ҕа уматык уон күннээх саппааһа баар буоларын модьуйда. Маны таһынан кини салюттар анал маҕаһыыннарга атыыланыахтаахтарын ыйда, ону ИдьМ үлэһиттэрэ хонтуруоллуулларыгар сорудахтаата.

Култуура управлениетын салайааччыта Лена Соловьёва иһитиннэрэринэн, бары дириэктэрдэр Саҥа дьыллааҕы бырааһынньык былааннарын туттарбыттар, баһаартан сэрэхтээх буолууга бирикээһи таһаарбыттар. Оттон, бүгүҥҥү туругунан, баһаарынай сулууспаттан көҥүлү Ойуһардаах бөһүөлэгэ эрэ ылан турар. Баһаарынай кэтэбил Орто Халыматааҕы кылаабынай государственнай инспектора Фрументий Саввинов: „Улууска икки саҥа объекка — Хатыҥнаахха уонна Өлөөкө Күөлүгэр култуура-сынньалаҥ кииннэригэр — баһаарынай сигнализация туруорулла илигинэн, көҥүл бэриллибэт“, — диэтэ.

Үөрэх управлениетын начаалынньыга Александр Третьяков баһаартан сэрэхтээх буолууга бирикээһи таһаарбытын, дьуһуурустубаны олохтообутун эттэ. Үөрэх тэрилтэлэригэр саҥа дьыллааҕы тэрээһиннэр ахсынньы 24 күнүттэн тохсунньу 5 күнүгэр диэри ыытыллаллар. Көҥүлү Хатыҥнаах, Налимскай оҕо саадтара уонна оскуолалара, Эбээх оскуолата, Арҕахтаах оҕо саада ылбыттар. Сыбаатайга оҕо саада саҥа үлэҕэ киирбит буолан, сигнализация эмиэ туруорулла илик. Онон Саҥа дьыллааҕы утренник ыытыллара табыллыбат. Өлөөкө Күөлүн агро-оскуолатыгар сигнализация үлэлээбэт. Россия ЫБММ Орто Халыматааҕы салаатын начаалынньыга В.В.Винокуров ахсынньы 25 күнүгэр диэри Өлөөкө Күөлүгэр сигнализацияны туруортарыах буолла.

Киин балыыһа кылаабынай бырааһын солбуйааччы Татьяна Габышева: „Тохсунньу 1 күнүттэн 11 күнүгэр диэри сынньалаҥ күннэр буолаллар. Ол гынан баран оҕо консультацията, поликлиника тохсунньу 1 күнүттэн 7 күнүгэр диэри уонна тохсунньу 8 күнүттэн 11 күнүгэр диэри биирдии күн үлэлиэхтэрэ“, — диэтэ. Үлэ чааһа нэһилиэктэргэ күн аҥардыыта эбит буоллаҕына, куоракка ыарыһах төһө сылдьарыттан тутулуктаах буолуоҕа.

„Управ Дом“ ХЭТ дириэктэрэ Ю.Н.Юдин Николаев уулуссатыгар саҥа тутуллубут уонна төрдүс тепловой пууҥҥа холбонон турар дьиэлэргэ итии кыайан тиийбэтиттэн, дьон кыһалҕаттан күнүстэри-түүннэри ууну сүүрдэллэрин, онон сибээстээн септик түргэнник туоларын эттэ. Ититэр ситимҥэ уу эргиирэ мөлтөх буолан, уопсайа 4 дьиэҕэ радиатордар тоҥон тоҕута барбыттарын уһулбуттар.

Р.С.Гаврильев: „Южная“ хочуолунайга биригээдэ үлэлии сылдьар. Куоракка 6 №-дээх хочуолунайга эбии биригээдэ ыыталларыгар эппиппит. Онон саҥа дьылга диэри хочуолунай холбонуон наада. Маны таһынан, бу биригээдэ тепловой пууннары бэрэбиэркэлиэҕэ“, — диэтэ.

Ахсынньы 10 күнүгэр хамыыһыйа 15 №-дээх дьаһала таҕыста. Онно нэһилиэк дьаһалтатын баһылыктарыгар нэһилиэнньэни уунан хааччыйыыга, бөх-сыыс тутатына ыраастанарыгар болҕомтону ууралларыгар, баһаартан сэрэтии үлэни, үөрэхтэри ыыталларыгар, ОДьКХ уонна ДЭС тэрилтэлэрин бэрэбиэркэлииллэригэр сорудахтанна. Дьаһал быһыытынан бырааһынньык кэмнэригэр баһылыктар ханна да айанныа суохтаахтар.

Хочуолунайдарга күүстээх хонтуруол олохтонуоҕа. Ахсынньы 31 күнүгэр диэри тэрилтэлэргэ баһаарынай сигнализациялар бары үлэлиир буолуохтаахтар.