Улууска тыа хаһаайыстыбата сайдарыгар олохтоох дьаһалта улахан болҕомтотун уурар. Ол курдук бэйэтин бюджетыттан үбү көрөн көмөлөһөр. Холобур, быйыл 11 мөлүйүөн солкуобайы көрдө. Хоту дойду тыйыс усулуобуйатыгар хороҕор муостааҕы, сыспай сиэллээҕи иитии, биллэн турар, үгүс сыранан ситиһиллэр. Хаһаайыстыбалар сүөһү ахсаанын энчирэппэт туһугар кыһаллаллар. Кинилэргэ улуустааҕы управление күүс-көмө буолар.

Ааспыт сыл улуус тыа хаһаайыстыбатын бары салааларыгар кэккэ ситиһиилэрдэннэ. Олортон сорохторугар тохтоотоххо, оттооһуҥҥа аныгы техниканы туһаныы сыыйа-баайа киллэриллэр. Ол курдук, ааспыт от сезонугар Налимскайга пресс-подборщигы аҕалан үлэлэппиттэрэ. Маныаха даҕатан эттэххэ, улууска таһаҕаһы тиэрдии уустуктардаах. Сайыҥҥы навигация аһыллаатын кытта муораны өксөйөн Халыма өрүһүнэн тиэллэн кэлэр. Кыһынын - уһун унньуктаах массыынанан айан. Орто Халыматтан Дьокуускайга диэри самолетунан 3 чаас 20 мүнүүтэнэн көтөҕүн. Онно улахан киһиэхэ билиэт сыаната 25 тыһыынчаҕа тэҥнэһэр. Ити барыта тиэллэн кэлэр табаар, мал-сал сыанатыгар охсор. Атыыласпыт техникаҥ аҥардас тиэллэн кэлиитигэр биир оччо ороскуоту көрсөҕүн. Онон пресс-подборщигы аҕалыы син улахан ситиһиигэ тэҥнээх.

Оҕуруот аһын сиэмэтин аҕалан олордууга үлэ ыытыллыбыта. “Якутянка” диэн элитнэй хортуоппуй суордун аҕалан сайаапкалаахтарга тарҕаппыттара. 1 тонна 420 киилэ сиэмэ хортуоппуйу олордон күһүнүн 25 тонна 200 киилэ хортуоппуй ылбыттара. Быйыл нэһилиэнньэттэн эмиэ сайаапка хомуйуута саҕаланна. Инникитин улуус хас биирдии ыала оҕуруот аһынан бэйэтин хааччынарын курдук үлэ барыахтаах.

Ыаллыы сытар Үөһээ Халыма улууһуттан 7 сибиинньэ атыылаһыллан эмиэ сайаапкалаахтарга тиэрдиллибитэ. Бу үлэ быйыл да салҕаныаҕа.

Сири оҥорууга федеральнай бырагыраамаҕа аан бастаан кыттан, үбү ситиһэн, Налимскайга Малаас учаастагын дулҕаттан, талахтан ыраастаан, ходуһаны оҥорууга үлэ ыытыллыбыта.

Быйыл искусственнай сиэмэлээһиҥҥэ специалистары үөрэтиигэ, сиэмэни аҕалыыга үп көрүлүннэ.

Халыма сылгыта племенной, элитнэй боруодаҕа киирсэрин билэбит. Ону улуус эрэ иһигэр буолбакка, республикаҕа тарҕатыы, тэнитии ирдэнэр. Ааспыт сылга Өлөөкө Күөллээҕи сылгы собуотун 8 сылгыта Үөһээ Бүлүү Тыымпытыгар атыыламмыта. Оттон быйыл Муомаҕа — 10, Намҥа — 20 убаһа, Абыйга — 4 атыыланара былааннанар. Үөһээ-халымалар 10-ну ылыахтарын баҕаралларын биллэрбиттэр.

Онон сэмэй ситиһиилэртэн кынаттанан, уһук хоту улууска тыа хаһаайыстыбата тэтимнээхтик сайдарыгар күүстээх үлэ барар.