Бу иннинэ кинилэр тэрилтэлэринэн сылдьан үлэни-хамнаһы кытта билистилэр. Ол курдук, „Якутоптторг“ тэрилтэ аһынан-үөлүнэн хааччыллыытын билистилэр, социальнай суолталаах, сибиэһэй оҕуруот астара нэһилиэнньэҕэ тиэллиитин быһаарыстылар. Салгыы оройуоннааҕы нефтебазаҕа сырыттылар. Халаанныыр түбэлтэтигэр, тэрилтэ дьиэтэ уонна уматык емкостара ууга барар кутталлаахтар. Онно сэрэтэр үлэ туһунан салайааччы Владимир Шаборшин билиһиннэрдэ.

Халаантан эмсэҕэлээбит дьоҥҥо Николаев уулуссаҕа тутуллубут саҥа дьиэлэри, Навроцкай уулуссаҕа турар хаарбах туруктаах 2 дьиэ хаһаайыттарыгар анаан тутулла турар дьиэни көрдүлэр. Юрий Николаевич элбэх тутуу барарын бэлиэтээтэ.

Көрсүһүүгэ Юрий Зайцев салайар кэмитиэтин туһунан кэпсээтэ, „Саханефтегазсбыт“, „Туймаада-нефть“, „Туймаадаагроснаб“, „Якутоптторг“, о.д.а. тэрилтэлэр үлэлэрин хонтуруоллуурун эттэ.

Алексей Киселёв салайар кэмитиэтэ ааспыт сыл атырдьах ыйын 14 күнүгэр тэриллибитин, штатыгар 21 үлэһиттээҕин эттэ. Кэмитиэт чуолаан арктическай оройуоннар экономическай-социальнай сайдыыларыгар көмөлөһөр соруктаах. Тыа хаһаайыстыбатыгар сүрүн сыаллара таба ахсаанын элбэтии буолар. Сылын ахсын таба аҕыйаан, билигин республика үрдүнэн 161 тыһыынча эрэ төбө хаалбыт. Онон табаһыттарга үлэ усулуобуйатын тупсарар, инникитин элбэх төрүөҕү ылар иһин күүстээх үлэни ыытар сыал-сорук турар.

Дмитрий Лепчиков сааскы халаан уутугар салалта бэлэмнээх буолуохтааҕын этэн туран, Орто Халыма куораты уу тахсыытыттан харыстыыр тутуу бырайыага оҥоһуллан бүтэн, билигин Москва куоракка экспертнэй хамыыһыйа үөрэтиитигэр баарын иһитиннэрдэ. Хамыыһыйа үлэтин түмүгэ бэс ыйын ортотугар биллиэхтээх. Ити кэннэ, манна, миэстэтигэр, уопсастыбаннай истиилэр буолуохтара диэтэ. Бэлиэтээн эттэххэ, бу тутуу уопсай сыаната 2 миллиард солкуобай. Тутуу Кузаковка оройуонугар уонна Анкудинка үрэҕи кыйа барара былааннанар. Маны сэргэ Дмитрий Николаевич ууттан эмсэҕэлээбит дьоҥҥо ананан тутуллубут Николаева уулусса 34/8-гар турар 16 кыбартыыралаах дьиэ силигэ ситэн, атырдьах ыйын ортотугар дьон олороругар бэлэм буолуо диэн эрэннэрдэ.

Быыһыыр сулууспа салайааччыта Николай Находкин улууска былырыын саҥа тэриллибит сулууспаҕа саҥа дьиэ тутуллуоҕун эттэ. Ол курдук, туруохтаах сирэ номнуо быһаарыллан, Ярославскай уулусса 31 нүөмэригэр тутуута саҕаланыаҕа. Маны таһынан сулууспа араас техниканан хааччыллыаҕа. Бу күннэргэ кинилэргэ анаммыт вездеход улууска кэлбитин туһунан иһитиннэрдэ.