Халыма өрүскэ Аллараа Халыма уонна Орто Халыма сиригэр-уотугар муус балысханнык бара турар. Орто Халыма куоратыгар бэс ыйын 4 күнүнээҕи туругунан уу таһыма 1131 см, оттон уу 1200 см тыҥааһыны, кутталы үөскэтэр. Бу күн манна правительство вице-премьерэ Анатолий Скрыбыкин кэллэ. Кини куораты кэрийэ сылдьан быһыыны-майгыны билистэ.

Нэһилиэнньэҕэ иһитиннэрэр, сэрэтэр үлэни эбии ыытарга сорудахтаата.

Уу таһыма, баҕар, кыратык намтыан сөп. Ол кэнниттэн хас эмэ күн устата үрдүөҕэ.  Анатолий Скрыбыкин  ыксаллаах быһыы-майгы кэмитиэтин, олоҕу уонна дьоҥҥо куттал суох буолуутун хааччыйар тэрилтэлэр салайааччыларын мунньан бэс ыйын 5 күнүгэр суһал мунньаҕы ыытар туһунан сорудахтаата. Вице-премьер гидрометеорологическай балаһыанньа уустугурбутунан олохтоох былаас уорганнара дьону айылҕа иэдээниттэн харыстыыр туһугар эбии миэрэлэри ылалларыгар модьуйар.   

Ыксаллаах быһыыга-майгыга оройуон хамыыһыйатын бэрэссэдээтэлэ Руслан Гаврильев эппитинэн, куоракка бүгүҥҥү туругунан икки тэлгэһэ ууга былдьаммыт. Аэродром балаһатыгар, нефтебаза уонна кылаабыһа баар сирдэригэр уу тиийэн эрэр.

110 киһини батарар быстах кэмнээх пууннары бэлэмнииллэр. Манна 20-чэ киһи кэлээччи, атыттар аймахтарынан тарҕаһаллар. Ас, эмп, иһэр уу саппааһын бэлэмнээбиттэр. Аэродром балаһатын куулга кутуллубут кумаҕынан эргиччи төгүрүтэллэр. Дьон баайын-дуолун старховкалааһын үлэтэ күүскэ барар, дьоҥҥо элбэхтэ иһитиннэрии оҥоһуллар.