«Быһыы-майгы уларыйда, бу сылга бюджет тутууну ыытары көҥүллээбэт», - диэтэ Сардаана Татаринова. Оскуола тутуутун боппуруоһун хаһыс да сылын Дьокуускай куорат «Айылгы» төрөппүттэрин общественнай тэрилтэлэрэ туруорсаллар. Кинилэр бары ахсынньы 3 күнүгэр миниистири кытта көрсүһүүгэ кэллилэр. Көрсүһүүгэ итини таһынан народнай депутат, наукаҕа, үөрэххэ, культураҕа, иһитиннэрэр-биллэрэр информацияҕа уонна общественнай тэрилтэлэр дьыалаларыгар сис кэмитиэт бэрэссэдээтэлэ Антонина Григорьева сырытта. Антонина Афанасьевна оскуола туттуутун саҕалыыры өйүүр.
«Айылгы» ытыктанар общественнай тэрилтэ бэрэссэдээтэлэ Матрена Попова эппитинэн, «биһиэхэ бу оскуолаҕа баар национальнай, сахалыы эйгэ олус суолталаах». «Ити эйгэ оҕо ис уйулҕатын бүтүннүү үөскэтэр, -диэн бэйэтин санаатын быһаарар Матрена Попова. - Сахалыы тылы үөрэтэр кылаастар аһыллалларын өйдүүбүт. Ол эрээри оҕо сылдьарыгар табыгастаах эйгэни үөскэтэргэ уонна сайыннарарга маннык оскуолалар эрэ кыахтарын иһигэр баар. Кинилэр сахалыы төрүтү толору олохтуурга туһуланаллар».
«Бүгүҥҥү туругунан оскуола быйыл бастакы бүтэрээччилэри таһаарыа, оттон оскуолабыт дьиэтэ баччааҥҥа диэри суох», - диир оскуола директора Лидия Шамаева. Оҕо Дыбарыаһыгар баар оскуола 10 кабинеттаах, олор СанПин ирдэбилигэр эппиэттээбэттэр. Быйылгы үөрэх сылыгар манна 1-тэн 11-кэ диэри кылаастарга 563 оҕо икки сменанан үөрэнэллэр. Ити уон кабинеттан ураты биир да анал үөрэтэр, эбии үөрэҕи ыытар, спортивнай-чэбдигирдэр, ону таһынан аһатар уо.д.а. сирдэр суохтар. Директор оскуола эһиил саҥа үөрэнээччилэри ылар кыаҕа суох диэн эттэ.
Оскуола 2012 сыллаахха оҥоһуллубут бырайыактаах, ол эрээри ол Госэкспертизаны ааспатах. Дьокуускай 47-с кварталыгар тутуллар сир бэриллибитэ, Уокуруктааҕы администрация дьиэлэри көһөрүү туһунан боппуруоһу көрө сылдьар. Гордума депутата Ольга Саргыдаева СИА-ҕа быһаарбытынан, бу ыйга үөрэххэ кэмииссийэ мунньахтыа, онно ити боппуруоһу көрүөхтэрэ. «Айыы кыhата» тутуллар сириттэн дьиэлэри көтүрүүгэ, олохтоохтору көһөрүүгэ бюджеттан 144 мөл солкуобай көрүллүбүтэ. Тутуу кэлэр сылга былааннаммыта», - диэтэ кини.
Төһө да усулуобуйа суох буоллар, филиал коллектива үрдүк ситиһиилэрдээх. Ааспыт үөрэх дьылын түмүгүнэн «Айыы кыhата» үөрэҕи инновационнайдык тэрийии иһин СР Президенин гранын ылбыта.
Миниистири кытта көрсүһүү кэнниттэн кэлэр сылларга оскуола тутууну саҕалыырга спонсорскай эбэтэр бюджеты таһынан үбү буларга үлэлэһэргэ күһэллиэҕэ.
Комментарии
Авторизация на сайте через социальные сети