Эми атыылааһыны кытары быһаччы үлэлээччилэр эппиттэринэн, Дьокуускайга эмп сыаната Саҥа дьылтан тута 8-10 бырыһыан (Россияҕа – 15%), ол эбэтэр 50-100 солкуобайынан үрдээбит.
Дьиктитэ диэн, аптекаларга сыана аҕыйах да кэппиэйкэнэн буоллар, араастаһар. Ол аптека куорат киинигэр эбэтэр кытыытыгар турарыттан тутулуга суох. Москва, Новосибирскай, Хабаровскай уо.д.а. тириэрдээччилэртэн (поставщиктартан) улаханнык тутулуктанар эбит.
Онон эмп сыаната уларыйыыта Россия экономикатыгар хайдах дьайыаҕын киин хаһыаттар матырыйаалларын туһанан ырытан көрөргө холоннубут.
Олоххо-дьаһахха туттарга суолталаах эмтэр
Экспертэр 2015 сылга эмп сыаната (ол иһигэр, ЖНВЛП – судургутук эттэххэ, олоххо-дьаһахха туттарга суолталаах эмтэр) 25-30 бырыһыан үрдүөҕүн сабаҕалыыллар. Оттон РФ бырабыыталыстыбатын бэрэссэдээтэлэ Дмитрий Медведев сыана үрдээһинэ солкуобай куурса улаатыытын эбэтэр үспүкүлээннээһини кытары сибээстээҕин бигэргэтэн туран, суолталаах эмтэр сыаналара хонтуруолланыахтарын мэктиэлиир. Эмп сыаната үүнэ-тэһиинэ суох ыарыыр чинчилээх буоллаҕына, арай суолталаах эмтэр сыаналарын (чуолаан эргиэн надбавкатын) судаарыстыба бэрээдэктиир.
Саха сирин специалистара бигэргэтэллэринэн, биһиэхэ эмиэ суолталаах эмтэр сыаналара үрдээбэт, арай судаарыстыба хонтуруоллаабат эмтэрин сыаналара уларыйар. Ол эрэн, СӨ Доруобуйа харыстабылын министиэристибэтэ эмкэ барытыгар мониторинг ыытар.
Аптекардар бигэргэтэллэринэн, сыана төһө да үрдээбитин иһин, дьон син бииргэ эмкэ наадыйар, атыыласпытын курдук атыылаһар. Онуоха утары баран, сорох аптекалар ый 15 уонна 25 күннэригэр 10 бырыһыаннаах чэпчэтиилэри оҥороллор. Ол эрээри чэпчэтииттэн аккаастанар аптекалар бааллара кистэл буолбатах.
Саппааһырыы
РФ Доруобуйа харыстабылын министиэристибэтэ кириисис иһэрин билгэлээн, ааспыт сыл алтынньытыттан эми кииннээн атыылаһыыны тэрийбитэ. Инньэ гынан, нэһилиэнньэни 2015 сыл балаҕан ыйыгар диэри тиийэр сыаналаах эминэн хааччыйда. Билигин Доруобуйа харыстабылын министиэристибэтэ Россияҕа суох омук эмтэрин тастан атыылаһыыны аҕыйатар санаата суох. Миниистир Вероника Скворцова эппитинэн, урут тастан киллэриллэр эмтэр испииһэктэрэ оннунан хаалларылыннылар.
Киһини сэрэхэтитэр чахчылар
Эмкэ сыана үрдэтиллибэтэ кэтэх өттүлээх буолуоҕун билигин үөскээн эрэр уустук балаһыанньа көрдөрөр. Ол эбэтэр, Россияҕа эми, араас препараттары оҥорор собуоттар, фирмалар ыксаллаах балаһыанньаҕа киирэн эрэллэрин туһунан элбэхтик суруйдулар.
Холобур: – "Дальхимфарм" барыс киирбэтиттэн сылтаан, сорох чэпчэки сыаналаах препараттары оҥорууну тохтотто.
– Самарскай уобалас «Озон» собуота эмиэ итинник турукка киирдэ. 149 араас эми оҥороруттан 42 эмп оҥоһуллуута хоромньуга эрэ тириэрдэр буолла, хас биирдии төрдүс эмп оҥоһуллубат кутталга киирдэ.
– "Татхимфармпрепараты" ААО оҥорор 49 араас эмиттэн 27-тэ хоромньулаахха киирсэр,
– "Мосхимфармпрепараты" собуот оҥорорго барыһы аҕалбат эмэ 60 бырыһыаҥҥа тиийэр кутталланна.
Атын да собуоттар итинник хоромньулаахтык үлэлиир санаалара суоҕун биллэрдилэр. Оннооҕор искэн ыарыылаахтарга анестетиктары оҥорор фармацевтическай собуот эми оҥорорун тохтотто.
Тоҕо? Тоҕо диэтэххэ, булгуччулаах испииһэккэ киирэр эмтэр муҥутуур сыаналарын судаарыстыба хонтуруоллуур уонна сылга биирдэ инфляция буоллаҕына эрэ хос көрүллэллэр, атын коэффициеннар учуоттамматтар.
Оттон омук сириттэн атыылаһыллар сырье, көмө матырыйааллар сыаналара быйыл эмискэ улааттылар, өссө да үрдүү тураллар. Валюта курса арыттаһыытыттан эбии ороскуоттар тэҥинэн улааталлар. Ол түмүгэр дойду эми оҥорор үгүс тэрилтэлэригэр чэпчэки сыаналаах эми (ол иһигэр, ЖНВЛП) оҥоруу ороскуоттаах эрэ буоларын курдук балаһыанньа үөскээтэ.
Ордук кутталлааҕа диэн, бастатан туран саамай чэпчэки (100 солкуобай сыаналаах) эмтэр эргииртэн туоруур кутталлаахтар. Ити барыта дойдуга оҥоһуллар эмтэри омук сыаналаах эмтэринэн толору солбуйарга тириэрдиэн сөп. Ол кириисис кэмигэр Россия нэһилиэнньэтин кыаммат араҥатыгар хайдахтаах охсууну оҥоруон саныахха ыарахан.
Чэпчэки эмтэри оҥорон таһаарыыны тохтотуу дойдуга эминэн хааччыллыыны мөлтөтөрүн аанньа, омук препараттарын атыылаһарга бюджеттан эбии ороскуоту эрэйэр. Судаарыстыбаннай реестр түмүктэрэ көрдөрөллөрүнэн, Россия үгүс эмин сыаната омук эминээҕэр 5-10 төгүл намыһах. Ол түмүгэр эми оҥорон таһаарыыга федеральнай уонна регионнар бюджеттара 100 миллиардка тиийэ сууманы сүтэрэр кутталлаахтар.
Бу кими да куттааһын буолбатах. Россия бииртэн биир фармацевтическай тэрилтэлэрэ чэпчэки сыаналаах эмтэри оҥорууну тохтотоллорун курдук балаһыанньаҕа киирдилэр (сыананы бэрээдэктээһин билиҥҥи систиэмэтиттэн уонна валюта куурса эмискэ үрдээбититтэн).
Омук эмэ сабардыыр чинчилээх
Практика көрдөрөрүнэн, Россия олохтоохторо омук эмин туһана үөрэммиттэр (нэһилиэнньэҕэ тарҕанар эмп 70 бырыһыана – омук эмэ). Дьиҥэр, бэйэбит эмпит омук эмиттэн сыаналара 5-10 төгүл намыһах.
Биир өттүнэн толкуйдаан көрдөххө, эмп сыаната улаатарын бопсуу чэпчэки сыаналаах эмтэр Россия рыногыттан сүтэллэригэр тириэрдэр. Оччотугар омук фармацията монополист буолара саарбаҕа суох.
Ону бигэргэтэрдии, РФ премьер-миниистирэ Дмитрий Медведев Россия былаастара омук эмтэрин (Россияҕа кыайан солбуллубат) атыылаһыыны хааччахтыыр санаалара суоҕун туһунан олунньу саҥатыгар иһитиннэрэн турар.
РФ Уопсастыбаннай палататын чилиэнэ В.Сергачев быһаарбытынан, Россия фармацевтара уонна эмчиттэрэ дойдуга оҥоһуллар эмп батарылларыгар интэриэстэрэ суох. Дьиҥэр, кинилэр рецепт суруйалларыгар бастатан туран, дойду эмин суруйуохтаах этилэр. В.Сергачев бигэргэтэринэн, омук бөдөҥ хампаанньалара быраастар омук эмин суруйалларын анаан-минээн үбүнэн көҕүлүүллэр уонна Вероника Скворцоваттан омук эмин нэһилиэннэҕэ билиһиннэрэргэ, тарҕатарга көрдөһөллөр диэн сурахтар бааллар. Тыала суохха мас хамсаабат...
Комментарии
Авторизация на сайте через социальные сети