Наркотик улуустарга тарҕанан эрэр

- Дьокуускайга сүнньүнэн, Кытайга оҥоһуллубут синтетическэй наркотиктар киэҥник тарҕаналлар. Саҥаттан саҥа ааттаах спайстар баар буолан иһиилэрэ үлэбитигэр үгүс уустуктары үөскэтэллэр. Олор бобуулаах наркотиктар испииһэктэригэр киирэллэрин-киирбэттэрин түргэнник быһаартарар инниттэн киин куораттарга ыытан экспертиза оҥотторобут.

Наркотигы оттон-мастан, үүнээйиттэн эмиэ оҥороллор. Биһиги үлэһиттэрбит уонунан киилэ көнөпүлэни хомуйбут дьону тутааччылар. Амур уобалаһыттан гашиш арыытын аҕалан иһэн Алдаҥҥа тутуллубут түбэлтэлэрэ баар. Бу көнөпүлэттэн ылыллар наркотик көрүҥэ.

Дьокуускайга наркотик өссө Москубанан эргийэн кэлэр буолла, онно олорор биир дойдулаахтарбыт Кытайтан Дьокуускайга аҕалан тарҕаталлар.

Аҕыйах сылтан бэттэх наркотигы куораттан илдьэн улуустарга тарҕатан эрэллэрэ киһини дьиксиннэрэр. Итинник түбэлтэлэри Үөһээ Бүлүү, Бүлүү улуустарыгар, соторутааҕыта Өймөкөөн оройуонугар арыйдыбыт.

Сыыппара тугу кэпсиирий?

- Кэпсээммитин сыыппара тылыгар таһаардахха, аҕыйах нэһилиэнньэлээх өрөспүүбүлүкэҕэ бөрүкүтэ суох хартыына көстөн кэлэр диэтэхпитинэ сыыспаппыт буолуо. 2014 сыл тохсунньу ый бастакы күнүнээҕи туругунан, учуокка турар наркоман дьон ахсаана 860 киһиэхэ тэҥнэстэ, ол иһиттэн: Дьокуускайга - 258, Мииринэйгэ - 245, Нерюнгригэ - 227, Хаҥаласка - 40, Ленскэйгэ - 22, Өлүөхүмэҕэ - 19, Намҥа - 18, Алдаҥҥа уонна Бүлүү оройуоннарыгар 10-нуу, Мэҥэ-Хаҥаласка - 6, Үөһээ Бүлүүгэ - 2, Булуҥҥа, Үөһээ Халымаҕа, Томпо оройуоннарыгар 1-дии киһи бу ыарахан ыарыынан ыалдьар. Көстөрүн курдук, наркоманнар илин, арҕаа, хоту, соҕуруу оройуоннарга, ырааҕыттан-чугаһыттан тутулуга суох, тарҕаммыттар. Манна биири өйдүүр хайаан да наада: сорох оройуоннарга ыарахан ыарыһахтааҕар наркотигы көннөрү боруобалааччылар ахсааннара лаппа элбэх. Холобура, наркотигы боруобалыыр киһи ахсаана ыарыһахтааҕар Дьокуускайга - 2, Алдаҥҥа - 26,6, Ленскэйгэ - 2, Намҥа, Өлүөхүмэҕэ - 6, Мэҥэ-Хаҥаласка - 4 төгүл элбэх. Оттон наркотигы боруобалыыр дьонноох оройуоннар ахсааннарыгар Уус- Дьааҥы, Уус-Алдан, Таатта, Амма, Ньурба оройуоннара эбиллэн биэрэллэр. Киһи дьиксинэр хартыыната диэтэҕиҥ.

Наркотигы утары туох үлэ ыытылларый?

- Алдан, Мииринэй, Нерюнгри, Ленскэй куораттарыгар наркоманияны утары охсуһууга анал бөлөхтөр тэриллэн үлэлииллэр, оттон өрөспүүбүлүкэ атын оройуоннарыгар холуобунай буруйу оҥорооччулары арыйар полиция үлэһиттэрэ дьарыктаналлар. Сылын аайы “Мак” диэн операция ыытыллар, улуустар дьаһалталарыгар көнөпүлэни суох оҥорууга өйдөтүү тиэрдиллэр. Доруобуйа харыстабылын уонна Юстиция миниистиэристибэлэрин кытта ыкса сибээстээхтик үлэлиибит. Көнөпүлэни суох оҥорууга анаан федеральнай үп көрүллэрин быһыытынан тиэхиньикэнэн, уматыгынан, оҕунуоҕунан хааччыллабыт.

Кинологическай сулууспа көмөтө улахан. Синтетическай наркотиктары быһаарар анал үөрэҕи барбыт ыттар баар буоллулар. Нерюнгри госавтоинспекциятын үлэһиттэрэ Амур уобалаһыттан киирэр наркотиктары элбэхтэ туттулар.

Түгэнинэн туһанан, өрөспүүбүлүкэ олохтоохторугар наркомания ыарахан ыарыы буоларын умнубакка, наркологическай сулууспаларга, балыыһаларга биллэрэн иһэргитигэр, биитэр “Телефон доверия”- 45-44-41 эрийэргитигэр этиэм этэ. Эдэр ыччатнаркотигы атыылааччылар угаайыларыгар киирэн биэрбэтин, бас бэриммэтин, куруутун чөл олоҕу тутуһан спордунан дьарыктаннын, - диэн Александр Александрович баҕа санаатын эттэ.