16 квартиралаах олорор дьиэ, тустуу саалата уонна музей үлэҕэ киирдилэр, диэн республика премьер-миниистирэ Галина Данчикованы кытта көрсүһүүтүгэр муниципальнай тэриллии баһылыга Алексей Мандаров кэпсээтэ. 2014 сыллаахха киириэхтээх биир социальнай суолталаах эбийиэгинэн оройуоннааҕы балыыһа буолар.

Ол эрээри тыа олохтоохторугар саҥа культурнай-спортивнай комплекс наада диэтэ баһылык. Соторутааҥҥа диэри оройуон бары тэрээһиннэрэ ыытыллар «Эйгэ» этнокультурнай киин 1956 сыллаахха тутуллубута, ону хаарбах туруктааҕынан саппыттара. Бары сынньалаҥ уонна культурнай тэрээһиннэр онно сөбө суох дьиэлэргэ ыытыллаллар. Миниистирдэр кабинеттарын баһылыга уонна оройуон баһылыга ити кыһалҕаны быһаарыы туһунан дьүүллэстилэр.

Өссө биир ырытыллар боппуруоһунан кытылы бөҕөргөтүү үлэлэрэ буоллулар. Эдьигээн нэһилиэгэ Өлүөнэҕэ түһэр Стрекаловка өрүс төрдүгэр турар, үс өттүттэн уулаах. Кытыл төрдө сылын аайы сааскы халаантан суураллар, кэнники кэмҥэ итинтэн чугас турар социальнай эбийиэктэргэ уонна олорор дьиэлэргэ суоһуур. Оройуон баһылыга эппитинэн, капитальнай тутуулар туһунан тыл барбат. Алексей Мандаров кытылы бөҕөргөтүүгэ дьоһуннаах үбү ирдээбэт эрээри, быдан көдьүүстээх атын ньымалар бааллар диэтэ. Премьер-министр Галина Данчикова Эдьигээн оройуонун баһылыгын ити этиилэрин өйөөтө.

Республика правительствотын бэрэссэдээтэлин секретариатыттан иһитиннэрбиттэринэн, премьер-миниистир көрсүһүүгэ итини таһынан аутсорсиҥҥа көһүү туһунан эттэ. Алексей Мандаров оройуоҥҥа аутсорсиҥҥа автотранспорт өҥөлөрө, оскуола оҕолорун аһылыктара көстө диэтэ. Оҕо саадын тутуу туһунан туспа кэпсэттилэр. Баһылык өссө чааһынай ыаллар кииннэммит ититиигэ киириэхтэрин баҕаралларын эттэ.

Муниципальнай тэриллии баһылыга бары ыйытыыларыгар республика премьер-миниистирэ толору харданы биэрдэ.