Кини Дьэлиҥдэ уонна Өлөөн сэлиэнньэлэригэр сылдьан аһылык сүрүн саппааһынан хааччыллыы туругун уонна атыы-эргиэн тэрилтэлэрин материальнай базаларын кытта билистэ, олохтоох бородууксуйаны оҥорон таһаарааччылары уонна урбаан бэрэстэбиитэллэрин кытта көрсөн кэпсэттэ.
Оробуочай сырыытын түмүгүнэн оройуон сүрүн тэрилтэлэрин, олохтоох бэйэни салайыныы дьаһалталарын бэрэстэбиитэллэрэ кыттыылаах сүбэ мунньаҕы ыытта.
Родион Федоров сүбэ мунньахха иһитиннэрбитинэн, Өлөөҥҥө судаарыстыбанан хонтуруолланар бородуукта сүрүн саппааһа бары 10 көрүҥэ ааспыт сыл туһааннаах кэминээҕэр элбэх аҕалыллыбыт. Бүгүҥҥү күннээҕи туругунан бородуукта сүрүн көрүҥүттэн ынах арыыта тиэллэ илигин эттэ, муниципальнай мэктиэлээһининэн нэһилиэктэргэ бородуукта сүрүн саппааһын атыылыыр оператордары кытта үлэни күүһүрдэр наадалааҕын бэлиэтээтэ.
Хотугу оройуоннар кииннэригэр баар «Якутопторг» база-маҕаһыыннара өр бириэмэҕэ хараллар бородуукта 11 эрэ көрүҥүн атыылыылларынан бары ночооттоохтук үлэлииллэрин ыйан туран, баларга дьон-сэргэ наадыйар коммерческай табаарынан эргинэр быраабы биэрэр наадатын эттэ.
Родион Федоров Өлөөн оройуонун олохтоохторун аһынан-үөлүнэн хааччыйыыны тупсарар инниттэн 2016 сылга Өлөөн сэлиэнньэтигэр таһаҕаһы харайар ыскылааттаах, оҕуруот аһын харайар анал хостоох саҥа маҕаһыын дьиэтин тутууну былаанныырын иһитиннэрбитин мунньах кыттыылаахтара ытыс тыаһынан көрүстүлэр.
Комментарии
Авторизация на сайте через социальные сети