Виктор Гаврильевич 1928 сыллаахха олунньу 18 күнүгэр Нам улууһун Таастаах нэһилиэгэр Бырдахтаах алааһыгар партийнай салайааччы Г.К. Петров дьиэ кэргэнигэр төрөөбүтэ. 1932 c. аҕата репрессияланан дьиэ кэргэнэ Дьокуускайга НКВД кэтэбилигэр-манабылыгар олорбут.

Виктор Петров 1951 с. Дьокуускайдааҕы художественнай училищены бүтэрэн баран куорат оскуолаларыгар черчения уонна уруһуй учууталынан, 1953-1983 сс. педагогическай училищеҕа сотруднигынан, онтон М.Ф. Габышев аатынан республикатааҕы уруһуй искусствотын музейыгар директорынан үлэлээбит.

Ааптар сөбүлүүр жанрынан пейзаж буолар. Сүрүннээн Саха сирин кэрэ айылҕатын уруһуйдуур. Аан бастакы айар үлэтин алмастаах Мирнэй куорат тутуллуутун уруһуйдаан саҕалаабыт («Новые дома алмазников» 1957; «Алмазодобывающая фабрика Нил», «Танцплощадка в Мирном», «Мирный строится» 1959).

Виктор Григорьевич Петров «С любовью малой Родине» диэн персональнай быыстапката аһыллар үөрүүлээх күнүгэр Нам улууһун баһылыга Александр Атласов, Таастаах нэһилиэгин баһылыга Евгений Федотов, Нам улууһун культуратын управлениетын начальнига Елена Заровняева, И.Е. Винокуров аатынан НПК директора Екатерина Ядреева, худуоһунньук-муосчут, Саха сирин Худуоһунньуктарын союһун председателин солбуйааччы Василий Амыдаев, З.П. Винокуров аатынан оҕо искусствотын оскуолатын директора Алексей Афанасьев, Намнааҕы историко-этнографическай музей научнай сотруднига Иннокентий Кривошапкин уонна Таастаах оскуолатын директора Туйаара Аргунова худуоһунньугу эҕэрдэлээтилэр, инникитин өссө да илиититтэн киистэни араарбакка салгыы айа-тута, уруһуйдуу сылдьарыгар, дьиэ кэргэнигэр дьолу, доруобуйаны баҕардылар уонна киниэхэ сыралаах үлэтин, улуус сайдыытыгар үтүөлэрин иһин «Нам улууһа» МТ сайдыытыгар кылаатын иһин» уонна «Нам улууһун культуратын бочуоттаах үлэһитэ» диэн түөскэ анньыллар бэлиэнэн наҕараадалаатылар.

Быыстапка аһыллыытыгар кыһыл аалай лиэнтэни мустубут дьон ытыс тыаһын доҕуһуолунан В.Г. Петров, А.П. Атласов, Е.В. Ядреева быстылар. Тэрээһини Национальнай ойуулуур-дьүһүннүүр музей быыстапкалыыр салаатын сэбиэдиссэйэ Варвара Заровняева иилээн-саҕалаан ыытта.