Билигин Яков олох атын киһи. Ватсапка "AGROSAKHA.RU" диэн анал бөлөх тэрийэн, Саха сирин бары улуустарыттан араас ис хоһоонноох атыы-эргиэн, тыа хаһаайыстыбатыгар туһалаах биллэриилэри таһааран, дьону түмэр.

Бүлүү Кыадаҥдатыгар командировкаҕа сылдьан Яков киһи сэргиир өссө биир дьарыктааҕын биллим. Кини хаарбах матасыыкыллары хомуйан, саҥаларыгар түһэрэр эбит!

"Тыа сирин олохтооҕор саамай наадалаах тэрил – матасыыкыл. Сорох дьон ону кыратык алдьанна даҕаны, быраҕан кэбиһэллэр эбэтэр ампаарга бөх-сыыс оҥорон, сылы сыллаан туруораллар. Биирдэ бэйэбэр алдьаммыт матыссыыкылы өрөмүөннээн баран, миинэ сырыттахпына, биир табаарыһым олох саҥа дии санаан:"Атыылаа", --диэн хаайда. "Эргэ", -- дии сатыырбын олох итэҕэйбэт. «Оччотугар хаска ылыаҥ этэй?" -- диэн ыйыппыппар, киһим: "15-кэ" -- диэн соһутта. Мин саппаас чааһыгар 2 тыһ. солкуобай эрэ ороскуоттаабытым. Ол онно бэйэҥ сыананы эппэккэ ыйытарыҥ ордугун өйдөөбүтүм. Өскө сөпсөспөтөххүнэ бэйэҥ эбэр буоллаҕыҥ дии", -- диэн Яков санаатын үллэстэр.

Тарбаҕар талааннаах эдэр киһи онно дьэҥкэтик өйдөөбүтэ – кини бэйэтин кыаҕын табаар оҥостон хайдах баҕарар атыылыан сөп эбит. "Биллэн турар, тыа сирин дьоно утары уунар харчылара суох. Онон оҥоһукпун эккэ, хортуоппуйга, үрүҥ аска атастаһабын, -- диир Яков Васильев.

Ити курдук, тыа сирин ыччата бэйэтин кыаҕын сатабыллаахтык туһанан, бэйэтэ да абыранар, дьону да абырыыр.

Хаартыскаларга: Яков Васильев оҥорбут матассыыкыллара.