Түүн 12.00 чааһы ааһыыта автобустар номнуо туоланнар, Бүлүүлүүр суолунан хотоҕостоннулар. Тохтоон бэйэ-бэйэбитин кэтэсиһэ-кэтэсиһэ айаннаан сарсыарда Бэрдьигэстээҕи аастыбыт. Күнүс 10 ааһыыта Бүлүү улууһун кыраныыссатыгар сахалыы таҥастаах оҕолор, кыргыттар, дьон-сэргэ тоҕуоруһан тураллар. Дьокуускайтан айаннаан кэлэр делегацияны түүнү супту күүппүттэр. Кымыстаах алаадьынан айах тутан, уот оттон алгыс этэн, ырыа ыллаан биһигини дойдулаах дьон үөрэ көрүстүлэр. Туустаах килиэбинэн, уохтаах кымыһынан айах туттулар.

Сибэкки дьөрбөтүн уурдулар

Бүлүү куоратыгар күнүс иккини ааһыыта кэллибит. Ыалдьыттары Бүлүү эбэ хотун үрдүгэр быйыл саҥа тутуллубут Кыайыы болуоссатыгар олохтоохтор улахан тэрээһиннээхтик көрүстүлэр. Бу болуоссат Бүлүү улууһун уоттаах сэриигэ кыттыбыт үс геройугар Н.Кондаков, А.Миронов, Н. Степанов, ону сэргэ алта социалистическэй үлэ геройдарыгар анаммыт болуоссакка көрсүүлэрэ мээнэҕэ буолбатах. Куорат баһылыга Александр Шипков, улуус сүбэ мунньаҕын бэрэссэдээтэлэ Гаврил Корякин, сэрии бэтэрээнэ Афанасий Николаев уонна Ыччат министрин бастакы солбуйааччы Гавриил Семенов тахсан эҕэрдэлээтилэр. Кинилэр эҕэрдэлэрин кэнниттэн кэлбит ыалдьыттар, олохтоохтор бары геройдар пааматынньыктарыгар сибэкки дьөрбөтүн уурдулар.

Доҕордоһуу аллеята

Олохтоохтор Бүлүү куоратын 380 сыллаах үбүлүөйүн көрсө куорат төрүттэниитин историятыттан кылгас инценировка туруоран көрдөрдүлэр. Кэлбит ыалдьыттарга “Ыччат аргыһа” диэн олохтоох “Олох суола” хаһыат ыччакка аналлаах сыһыарыытын, Хомустаах былаан-схематын тарҕаттылар. Онон ыһыахха кэлбит киһи баҕардаҕына даҕаны кыайан муммат усулуобуйатын тэрийбиттэр.

Сэргэх көрсүһүү кэнниттэн куорат пааркатыгар доҕордоһуу аллеятын аһыллыыта буолла.

Хомустаахха - кыра бизнес

Салгыы Ыччат ыһыаҕа буолуохтаах Хомустаах этнографическай комплекска сыыйа балаакка бөҕөтө дьэндэйдэ, саламанан киэргэннэ. Оннооҕор биир обургу бэскэ “Суотабай төлөпүөнү уокка ииттэрии – 100 солк.”- диэн сурук ыйаммыт. Бизнес биир көрүҥэ буолла5а.

Мин харахпынан, ыччат былырыыҥҥы курдук көхтөөх, уулусса кумаҕын өрүкүтэн көтүтэр ыһыах сүрүн бирииһэ “УАЗ” массыыналары үгүс ыччат ымсыыра, эрэнэ көрөр.