Бастаан бырааттыы Готовцевтарга тиийдибит. Василий уонна Иван – уус дьон. Кинилэр ыһыахха 24 сэргэни бэлэмниэхтээхтэр. Олортон тоҕус сэргэ Айыыларга ананар, хас биирди сэргэ анал бэлиэлээх. Саамай улахан сэргэ 4 миэтэрэттэн ордук, атыттар арыый намыһахтар - 3 миэтэрэ үрдүктээхтэр.

Тоҕус сэргэни сүрүн түһүлгэҕэ туруоруохтара. Атыттар ыһыахтыыр сиргэ киириигэ уонна кымыс иһиитин түһэлгэтигэр туруоруллуохтара.

Ыһыах саҕаланыар диэри Культура диэтигэр сыһыары тутуу бүтүөхтээх. Бу 120 кв. м иэннээх куупал формалаах тутуу. Бэдээрэтчит – „Сис Маар“ ХЭТ (генеральнай директор Андрей Васильев). Бу тэрилтэ урут оройуоннарга алта маннык объегы туппут. Холобура, Бүлүүгэ уонна Таатаҕа. Онон уопуттаах эбиттэр. Билигин тутууга түөрт киһилээх биригээдэ үлэлиир. Үлэ саҕаламмыт: тутуу площадкатыгар кумах-таас булкадыһыгын куппуттар, тимир, бетонунан акылаат оҥорбуттар. Тутуу сүрүн матырыйаала - лафет уонна буруус. Бу күннэргэ ититэр матырыйааллары, стеклопакет түннүктэри, тимир кырыыһа матырыйаалларын аҕалыахтаахтар. Сыһыарыы тутууга норуодунай суруйааччы Егор Неймохов аатынан түмэл уонна библиотека киириэхтээхтэр. Ыһыах кэмигэр Егор Неймохов „Ильмень үрдүнэн туруйалар“ айымньытынан араатар искусствотыгар куонкурус ыытыахтара.

Культура диэтин аттыгар 20-чэ сыллааҕыта олохтоохтор бэйэллэрэ оҥорбут фонтаннара баар. Быйыл оскуола урукку выпускниктара ону өрөмүөннүүргэ ылсыбыттар, наада буолар матырыйаалларын хайыы-үйэ атыыласпыттар.

Ааспыт сыллаахха нэһилиэк СР Ыччат уонна дьиэ кэргэн политикатыгар министерствотын хайысхатынан республикатааҕы үлэлээбэт ыччаты үлэнэн хааччыйыы куонкурсугар кыттыбыта. Атын оруйуоннар биэс нэһилиэктэрин иннигэр түһэн 1150 тыһыынча солкуобай суумалаах оборудованиены атыылаһарга грант сүүйбүтэ. Муниципальнай тэриллии 200 тыһыынча солк. хос үбүлээһин оҥорбут. Соторутааҕыта нэһилиэк баһылыга Юрий Комиссаров Алдан куоракка бара сырытта уонна наадалаах оборудованиены аҕалла. Челябинскай уобалас Златоуст куоратыгар оҥоһуллубут комплекка бетономешалка, транспортер, 3 станок, булкадыһыгы бэлэмниир распределитель киирэллэр. Маннык оборудованиенан тротуар билиитэлэрин уонна эркин блоктарын бэлэмнииллэр. Муниципальнай тэриллии дуогабарынан специалиһы ыҥырыаҕа. Кини таҥыаҕа, оборудованиены хайдах үлэлэтэри көрдөрүөҕэ. Оччоҕо алта үлэ миэстэтэ тахсыаҕа.

Ыһыах ыытыллар сиригэр 400 олорор миэстэлээх трибуналаах биир улахан сцена, 50-нуу олорор миэстэлээх ыскамыайкалардаах икки кыра сцена, биир улахан уонна улуус муниципальнай тэриллиилэрин ахсаанынан тоҕус кыра ураһа, аһыырга 15 хорчуопка, кымыс иһэр түһүлгэ, ыһыахтыыр сиргэ киирэргэ улаханнаах кыра параднай аркалар, ыһыах аһыллыытын сиэрин-туомун ыытарга аналлаах холумтан, 1 км усталаах күрүө тутуллуохтаахтар.

Тутуулар уонна сэргэлэри бэлэмнээһин бэдэрээтчитинэн урбаанньыт Александр Свинобоев буолар. Тоҕус кыра ураһаны муниципальнай тэриллиилэр бэйэлэрэ оҥоруохтаахтар.

Ыһыах объектарын тутуу болдьоҕо хантараак быһыытынан 2015 сыл бэс ыйын 15 күнэ.