Быйыл Баай Байанай бырааһынньыга Мэҥэ Алдаҥҥа ыытылынна. Кыттааччылары Томпо оройуоннааҕы Сэбиэтин бэрэссэдээтэлэ Илья Шадрин, нэһилиэк баһылыга Юрий Комиссаров, Томпотооҕу айылҕа харыстабылын инспекциятын старшай госинспектора Ньургустаан Бысыин эҕэрдэлээтилэр. Быйыл куоталаһыыга түөрт хамаанда кытынна.

Күрэхтэһии комбинированнай эстафетаттан саҕаланна. Эстафета түөрт түһүмэхтэн турар: 100 м булт хайыһарынан сүүрүү, дулҕалаах сиринэн сүүрүү, пневматическай саанан ытыы, бэрэбинэ уонна хаар устун 100 м сүүрүү.

Саамай түргэн, сымса уонна кыраҕы харахтаахтарынан Мэҥэ Алдан бэрэстэбиитэллэрэ буоллулар. Кинилэр дистанцияны 9 мүн. Түмүктээтилэр. Кириэс Халдьаайы хамаандата (12 мүн.) - иккис, Сайдыы хамаандата (16 мүн.) - үһүс буоллулар.

Хомуур хапсаҕай олус кэрэхсэбиллээх уонна көхтөөх буолла. Биирдии хамаанда үстүү киһини туруорда уонна бөлөҕүнэн кииристилэр. Манна Сайдыы эдэр хамаандата бастаата. Кинилэр харчынан бириэмийэлэннилэр. Иккис – Кэскил, үһүс миэстэ - Мэҥэ Алдан. Хомуур хапсаҕай сырдык күн уотугар тымныыны аахсыбакка хаарга күөлэһийэр оҕо сааспытын санатта.

Ойбон алларыытыгар хамаандалар иккилии кыттааччыны туруордулар. Бары бастакынан алларбыт Кэскил бэрэстэбиитэллэрэ көрдөрүүлэрин (12 мүн. 54 сөк.) куоһарар сыаллаах кииристилэр. Манна Мэҥэ Алдан хамаандата барыларыттан түргэнник алларда – 9 мүн. 33 сөк. Үһүс миэстэҕэ Кириэс Халдьаайы хамаандата таҕыста. Мэҥэ Алдан олохтооҕо Егор Протопоповка урукку кадровай булчут Дарбасов Гаврил Сергеевич уолаттара Гаврилтан, Петртан уонна Романтан анал сыаналаах бириис туттарылынна.

МЦ булт саатын үрэйиигэ уонна хомуйууга түргэн бириэмэни Кириэс Халдьаайыттан Николай Сыромятников көрдөрдө – 53,21 сөк.

Бултуу сылдьан уот оттуутугар кураанах маһы туттааччылар. Оттон манна эр дьон сытар маһы хайыттылар. Барыларыттан түргэнник хаһаайыттар үлэлээтилэр, Кинилэртэн кириэс-халдьаайылар 3,5 сөк., кэскиллэр 5 сөк. хааллылар. Уот оттуутугар уонна чэй өрүүтүгэр кэскиллэр бастаатылар. Кириэс Халдьаайы булчуттара иккис, мэҥэ-алданнар үһүс буоллулар.

Түмүккэ Байанай күнүн күрэхтэһиитин кыайылааҕынан Мэҥэ Алдан булчуттара буоллулар. Иккискэ – Кэскил, үһүскэ – Кириэс Халдьаайы булчуттара тигистилэр. Сайдыы хамаандата төрдүс миэстэҕэ тигистэ эрээри, хас даҕаны биһирэм бирииһи ылла: айылҕа харыстабылын инспекциятыттан талбыт ресурснай резерватка 10 хонукка бултуур путевка уонна оройуон Сэбиэтин бэрэссэдээтэлэ Илья Шадрин бэйэтэ оҥорбут икки анды мончуугун туттулар. Күрэхтэһиини тэрийбит Николай Андросовка уус охсубут саха быһаҕын бэлэхтээтилэр. Кэлэр сылга маннык тэрээһин Байаҕантай нэһилиэгэр ыытыллыаҕа.

Бары көрүҥнэргэ бириистээх миэстэлэргэ тиксибиттэргэ мэтээллэр, хамаандаларга кубоктар туттарылыннылар. Кириэс Халдьаайы хамаандатын састаабыгар нэһилиэк баһылыга Степанов Яков уонна нэһилиэк баһылыгын солбуйааччы Тарабукин Иван кытыннылар.

Мэҥэ Алдан баһылыга Комиссаров Юрий Байанай күнүгэр кыттыгас буолбут хоккеистар турнирдарыгар кыттыыны ылла. Түөрт хамаандаттан Мэҥэ Алдан хамаандата кыайыылааҕынан таҕыста. Федот Чахов (голкипер), Николай Степанов, Семен Тимофеев, Леонид Николаев, Юрий Винокуров, Прокопий Бурцев уонна Эдуард Гоголев састааптаах ыччат хамаандата чемпионнаата. Иккис миэстэҕэ - бэтэрээннэр, үһүс миэстэҕэ үөрэнээччилэр таҕыстылар. Хаандыгаттан сылдьар ыалдьыттар төрдүс буоллулар.