Манна «Байанай» булчут ыттаахтар кулууптарын салайааччыта Юрий Баишевы көрсөн сэһэргэстим.

- 2004 сыллаахха аан бастаан ыттары көрүү буолбута. Билигин бу ыты иитээччилэр сылы быһа кэтэһэр улахан бырааһынньыктара. Быйылгы быыстапкаҕа 100-тэн тахса ыт кытынна. Судьуйанан, экспертэринэн Москваттан Росохотрыболовсоюз булчуттар ыттарын салааларын салайааччы Кузина Марина Георгиевна, Зайцев Валентин Викторович уонна Камчаткаттан Молчанов Александр Олегович үлэлииллэр.

Бу быыстапкалар түмүктэринэн ыт тас көрүҥэ, үлэлиир хаачыстыбата да тубуста. Саха сирин хамаандата Россияҕа 4 төгүл ситиһиилээхтик кыттыбыта, - диэтэ Юрий Петрович.

Манна, өрүү буоларын курдук, үс боруода ыты - Арҕаа Сибиир, Илин Сибиир лайкалара уонна саха булчут лайката диэн наардаан киллэрэн рингэҕэ хаамтардылар.

Болуоссакка Булгунньахтаахтан сылдьар булчут Геннадий Иванову көрүстүм.

- Булдунан дьарыктанабын, быйыл булдум ортоһуор, биир бөрөнү ыллым. Булчут күнүгэр ыытыллар ыт быыстапкатыгар өрүү кыттабын. Бу сырыыбар 10 ыйдаах лайкам үһүс буолла, - диэн Геннадий үөрүүтүн үллэһиннэ.

Бастакы тэрээһиннэргэ ыт быыстапкатыгар кыттааччы аҕыйах эбит буоллаҕына, кэлиҥҥи сылларга элбээн, былырыыҥҥыттан өссө саха булчут лайката диэн боруода баар буолбут. Өктөм олохтооҕо Харитонов Андриан Михайлович ыта үстэригэр диэри саастаахтарга бастаан үөрэн-көтөн таҕыста.

- Быыстапкаҕа бу бастакы кыттааһыным, урукку сылларга көрөөччү быһыытынан интэриэһиргиир этим. Ытым Кэрэчээнэ диэн, Тиит Арыыттан төрүттээх, булка сылдьар. Улууспутуттан элбэх киһи ыттарын аҕалбыттар, Өктөмтөн биэс ыт манна быыстапкаҕа кыттар,- диэн үөрүүтүн үллэһиннэ.

Супер-бирииһи - «Бенелли» полуавтомат сааны - Мэҥэ-Хаҥаластан Геннадий Говоров ылла.

Тэрээһин иккис уонна үһүс күннэригэр Намсыырга булчут ыттары эһэҕэ тургутан көрүүгэ хамаанданан уонна биирдиилээн бастыыр иһин күрэхтэһии ыытылынна. Хамаандаҕа 4 ыт (2 ыт эһэни куолаан, атын 2 ыт биир-биир үрэллэр), ол иһигэр биир тыһы ыт баар буолара ирдэнэр эбит. Бу тэрээһини тэрийсэ уонна хамаанда тэрийэн киллэрэн кытыннара сылдьар Хаҥалас улууһун булчуттарын уопсастыбаларын бэрэссэдээтэлэ Николай Гоголевы кытта кэпсэттим.

- Хаҥаластан барыта биэс хамаанда кытта сылдьар. Ыт быыстапкатыгар икки ытым алын уонна үрдүкү бөлөхтөргө бастаатылар. Итинтэн кырата Илин Сибиир лайкаларыгар абсолютнай чемпион буолла. Өктөмтөн, Андриан Харитонов ыта ортоку бөлөххө Илин Сибиир лайкаларыгар, А.Артомонов ыта Арҕаа Сибиир лайкаларыгар бастаатылар. Н.Весвало ыта ортоку бөлөххө иккис буолла. Улахан Аантан В.Кириллин, Булгунньахтаахтан Г.Иванов ыттара үһүс буоланнар бу быыстапкаҕа балачча ситиһиилээхтик кытынныбыт,- диэтэ Николай Иннокентьевич.

Эһэни тургутан көрүүгэ икки күннээх күрэскэ уопсай түмүккэ Улахан Аантан газооператор идэлээх «Сахатранснефтегаз» тэрилтэ үлэһитэ Кириллин Витязь «Тирэх» хамаандата Тирэх, Чуурук, Көмүс уонна Бастыҥ диэн ыттарынан кыттан үһүс бочуоттаах миэстэҕэ тиксэн эрэһиинэ тыынан, сертификатынан наҕараадаланна. Тастыгиннар «Кыымаан» хамаандалара (Мэҥэ-Хаҥалас) иккис миэстэҕэ таҕыста. Манна Дьокуускайтан Василий Иванов «Ньоҕой» хамаандата бастаата, убаһанан бириэмийэлэннэ.