Манна Россия үрдүк үөрэҕин: Сибиирдээҕи федеральнай университет, А.И. Герцен аатынан Российскай государственнай педагогическай университет, Санкт Петербурдааҕы гражданскай авиация государственнай университета, Санкт Петербурдааҕы государственнай университет, МИСиС (НИТУ МИСиС) национальнай исследовательскай технологическай университет, Ураллааҕы федеральнай университет, Н.Э. Бауман аатынан Москватааҕы государственнай техническай университет, Новосибирскайдааҕы государственнай педагогическай университет, Хабаровскайдааҕы экономика уонна быраап государственнай академията, Ураллааҕы государственнай юридическай академия, Томскайдааҕы национальнай иследовательскай политехническай университет, Москватааҕы государственнай педагогическай университет бэрэстэбиитэллэрэ кэлбиттэр.

Олимпиада математикаҕа, историяҕа, нуучча тылыгар, физикаҕа, химияҕа, обществознаниеҕа, информатикаҕа, биологияҕа уонна географияҕа ыытыллыбыта.

Амма, Мэҥэ-Хаҥалас, Нам, Таатта, Томпо, Уус Алдан, Хаҥалас, Чурапчы улуустарыттан барыта 348 кыттааччы баара. Олортон 169 кыайыылаахха тус сыаллаах үөрэххэ дуогабар түһэрсэргэ сүбэлээтилэр.

Улууспутуттан 17 выпускник кытынна: Томпотооҕу киэҥ хайысхалаах гимназияттан – 10 киһи, Ыҥаа орто оскуолатыттан – 3, Кириэс Халдьаайы орто оскуолатыттан – 4 выпускник. Томпотооҕу киэҥ хайысхалаах гимназия 10 выпускнигыттан 8 выпускник математикаҕа 90-тан тахсалыы баалы ыллылар. Физикаҕа 70 баалтан 70 баалы гимназия үөрэнээччитэ Винокуров Егор, Тиянич Богдан, Прокопьев Айаал ыллылар.

Үөрэнээччилэр үс предмеккэ олимпиада сорудахтарын 100 баалга толордулар: математикаҕа, историяҕа уонна нуучча тылыгар. 100 баалы математикаҕа Томпотооҕу киэҥ хайысхалаах гимназия үөрэнээччилэрэ Прокопьев Айаал, Герасимов Евгений (учуутал Суслов Павел Валентинович) ыллылар. Олимпиада түмүгүнэн биһиги выпускниктарбыт математикаҕа, физикаҕа уонна нуучча тылыгар ситиһиилээхтик кытыннылар.

РФ үрдүк үөрэҕин кыһаларыгар киирии кэлэр түһүмэҕинэн биир кэлим государственнай экзамен буолуоҕа.