Тымныылар түспүттэриттэн уонна дьон олоҕор куттал үөскээбититтэн көрдүүр-быыһыыр управление начальнига Ньургустаан Андреев салайааччылаах 10 быыһааччылаах суһал бөлөх тэриллибитэ.

Кинилэр түүн «Урал» уонна «УАЗ» массыыналарынан көрдүү барбыттара. Суукка устата бөлөх тайҕаҕа быыстала суох көрдөөбүттэрэ. Быыһааччылар быраҕыллыбыт джибы уонна кутаа оннун булбуттара, ол эрээри дьон суохтара. Этэрээт салайааччыта десант бөлөхтөөх вертолет ыҥырарга быһаарыммыта, оттон бэйэлэрэ булчуттар хаалларбыт суолларынан салгыы барбыттара.

11.30 чааска аэромобильнай этэрээт начальнига Андрей Юргин салалталаах 4 киһилээх десант бөлөҕө «Полярные авиалинии» МИ-8 вертолетунан Хаҥалас улууһугар көппүтэ. Бөлөх үүтээннэри көрбүтэ, икки булчуттар массыыналарын тохтоппута. Тыа суолларын уратылара — дьон чопчу ханна барбыттарын ааҕан таһаарар кыаллыбатыгар сытар. Ол эрээри быыһааччылар сыралаах үлэлэрэ түмүктээх буолбута, трассаттан 50 кэриҥэ биэрэстэлээх сиргэ алаас устун сүүрэн иһэр саалаах соҕотох эр киһини бэлиэтии көрбүттэр. Түспүт вертолекка кэлэн, кини икки доҕотторо баар үүтээннэрин ыйан биэрбитэ. Хараҥаҕа массыыналара аппаҕа түһэн баран умуллан хаалбыт онон бэйэлэрэ хайдах да барар кыахтара суох буолан, сарсыардааҥҥа диэри кутаа аттыгар олорорго санаммыттар. Сотовай сибээһинэн аймахтарыгар биллэрбиттэр уонна ханан баалларын эппиттэр (хомойуох иһин, сирдэрин ырааҕын сыыстарбыттар, ол кэлин биллибитэ), сарсыарда сырдаан эрдэҕинэ сатыы барбыттар, ол эрээри муммуттар. Кыратык хааман баран, булчут үүтээнин булбуттар, онно быыһааччылары күүтэргэ быһаарыммыттар.

Үс мунаах булчуту быыһааччылар вертолекка ылбыттар, кэлин сиринэн көрдөөччү коллегаларыгар туттарбыттар. Доруобуйаларын туругар уонна ас-үөл кырыымчыгар үҥсүү киирбэтэ, диэн СИА-ҕа быыһыыр сулууспа бэрэстэбиитэлэ Николай Фатеев иһитиннэрэр.