- Былырыын суоллаан көрүүбүтүнэн, түөрт бөрө баара. Олорбут быйыл ууһаан-тэнийэн, уон биир буолбуттар. Сылгылары иэдэтэллэригэр тиийдилэр. Ыаллар ыксаан биэлэрин тиэргэннэригэр хаайан туруорарга күһэлиннилэр. Биһиги кыахпыт-күүспүт тиийэринэн бултаһа сатыыбыт. Күһүт диэн учаастакка алта биэни тардыбыттара. Саҥа дьыл бырааһынньыгын эрэ иннинэ биир биэни, түөрт хонуктааҕыта эмиэ биири тартылар. Быйыл биир үөртэн муҥутаан иккилии убаһаны ыллыбыт, -- диир бөрөнү бултуур анал биригээдэ биригэдьиирэ Александр Кириллин.

Кини кэпсииринэн, бэҕэһээ булчуттар бэһиэ буолан “Буранынан” тахсыбыттар. Ону билэн бөрөлөр ойуурга куоппуттар, маска да сөрөнөн саһа сатаабыттар, хаары да бүрүммүттэр. Ол эрээри, абарбыт булчуттар айбардаабыт ардай аһыылаахтары “Бураннарынан” эккирэтэн, күөйэн аҕыс бөрөнү Чыбыыда үрэх таһыгар тиийэн ситэн өлөртөөбүттэр. Олор ортолоругар биир моонньугар быһа киирбит туһахтаах бөрө баар эбит. Александр Кузьмич эппитинэн, Нам бөһүөлэгин булчуттара бөрөлөргө хапкаан, туһах ииппиттэр.

-- Онно биир бөрө туһахтарын тоҕо тардан илдьэ барбыт сураҕа иһиллибитэ. Ол буолуо, -- диэн сабаҕалыыр.

Бөдөҥ-садаҥ ардай аһыылаахтары соҕотох киһи кыайбат, иккилии буолан көтөҕөҕүн дэһэллэр. Маннык кыылы бултаһар манан аҕай буолбатаҕа сэрэйиллэр. Булчуттар Хатыҥ Үрэх диэн сиргэ өссө да алта-сэттэ бөрө баарын этэллэр.