Олохтоохтор көрсүһүүгэ хаарбах дьиэ боппуруоһун көтөхтүлэр. Маҥаас бөһүөлэгэр ааспыт үйэ 60-с сылларыгар тутуллубут оҕо саада уонна оскуола билигин да үлэлии туралларын эттилэр. Оҥхойго уонна Сургуулукка саҥа квартальнай хочуол тутуллара уолдьаспыт. Оттон улуус салалтата оройуоннааҕы культура дьиэтин уонна Нам сэлиэнньэтигэр 220 миэстэлээх оскуоланы тутууга көмөлөһөрүгэр көрдөстө.

Маны сэргэ, дьиэлэри электроэнергиянан сылытыыга үлэни салгыыр туһунан кэпсэттилэр. Манна даҕатан эттэххэ, депутат кыһамньытынан, Саха сирин арҕааҥы сэттэ улууһугар уотунан сылытыныыга чэпчэтиилээх тарыыптар олохтоммуттар. Онон ити улуустарга холботуохтарын баҕалаахтар элбээбиттэр.Гаврил Алексеев уотунан ититиигэ элбэх дьиэни, тутууну холботторор туһуттан, “Якутскэнерго” ААУо АК салалтатын кытта көрсөн кэпсэтиэх буолла.

Көрсүһүүгэ тыа сирин дьоно аутсорсинг кыһалҕата кыһарыйбытын, арыгы атыытын бэрээдэктиири, кыра нэһилиэнньэлээх сирдэргэ балыыһалар сабыллаллара ордук кырдьаҕастарга, оҕоҕо-урууга улахан охсуулааҕын, ракеталар тобохторуттан дьиксинэллэрин о.д.а. элбэҕи эттилэр, туруорустулар. Тыа хаһаайыстыбатыгар судаарыстыба оҥорор көмөтүн, социальнай төлөбүрдэри токкоолостулар.

Гаврил Алексеев дьон-сэргэ туруорсуутун хайаан да быһаарсыах буолан эрэннэрбитин туһунан “Сахаэнерго” ААУо пресс-сулууспата иһитиннэрдэ.