Томпоҕо ыччат ыһыаҕар бэлэмнэнэллэр

Томпо Мэҥэ Алданыгар республикатааҕы Ыччат ыһыаҕар бэлэмнэнэллэр. Ол курдук, араас өрүттээх үлэ - тутууттан саҕалаан ыһыах түһүлгэлэрин киэргэтиигэ, сэргэлэри оҥорууга тиийэ - саҕаланан эрэр.


Ыһыах эмблемата муус устарга бигэргэммитэ. Аһаҕас күрэс ыытыллан, онно киирбит 10-ча үлэттэн ыччат уонна дьиэ кэргэн политикатыгар министрэ Афанасий Владимиров икки эскиһи улуус дьаһалтатыгар талларбытыгар, Томпону кытта ыаллыы сытар Таатта улууһуттан төрүттээх Петр Доргуев үлэтэ кыайыылааҕынан билиниллибитэ.
Билигин Мэҥэ Алдаҥҥа эдэр урбаанньыт Александр Свинобоев уонча киһилээх биригээдэтэ үлэлиир. Кинилэр пилорамаҕа тутуу матырыйаалларын бэлэмнииллэр. Былааннаммыт тутуулары саҕалаатылар.
Өссө тохсунньу ортотугар улуус баһылыга Георгий Герасимов, баһылыгы социальнай боппуруостарга солбуйааччы Александр Андреев, улуус историятын үөрэтэр Николай Ефимов, Мэҥэ Алдан баһылыга Юрий Комиссаров, Байаҕантай баһылыга Яков Степанов Таатта Баайаҕатыгар Борис Неустроевка – Мандар Ууска баран ыһыах тэрээһинигэр сүбэ-ама ылбыттара. Үс түһүлгэҕэ 21 сэргэ туруоруллуохтаах. Манна олохтоох уус Василий Готовцев ылсан үлэлиир.

Хаандыгатааҕы хайа-геологическай техникум студеннарын 15 киһилээх этэрээтэ бэс ыйын 1 күнүгэр Мэҥэ Алдаҥҥа үлэлии барарга бэлэмнэнэр. Директор Михаил Неустроев этэринэн, техникум кинилэри инструменынан, үлэлиир, утуйар таҥаһынан, күннээҕи нуорма астарын суотугар бородууктанан хааччыйар. Мэҥэ Алдан дьаһалтатын баһылыга Юрий Комиссаров студеннары олордор сири, хамнаһы уонна эбии аһылыгы быһаарыахтаах. Этэрээт биир ый устата эргэ тутуулары көтүрүүнэн дьарыктаныаҕа.