Култуура улуустааҕы управлениетын салайааччы Екатерина Ноговицына иһитиннэрбитинэн, дьааҥылар быйылгы ыһыахтар эһиил ыытыллыахтаах өрөспүүбүлүкэтээҕи Олоҥхо ыһыаҕар бэлэмнэнии быһыытынан барыахтара.

Онон сибээстээн Екатерина Васильевна киин куоракка кэлэн, айар куттаах биир дойдулаахтарын мунньан тэрээһин мунньахтары ыытта, Олоҥхо ассоциациятын уонна театрын салалталарын кытта арктическай улууска ыытыллыахтаах Олоҥхо Ыһыаҕын тосхолун торумнаста, Саха араадьыйатыгар улуус баһылыга Виктор Павловы кытта "Быһа эфиргэ" тахсан, эһиил Дьааҥыга буолуохтаах суолталаах тэрээһин туһунан аһаҕас кэпсэтиини тэрийдэ.

Кэрэхсэбиллээҕэ баар, култуура управлениетын салайааччы бу күннэргэ Дьааҥы олоҥхотун историятын тилиннэрэр инниттэн өрөспүүбүлүкэтээҕи архыыпка үлэни тэрийдэ. Бу үлэни историческай наука доктора, Гуманитарнай институт эппиэттээх үлэһитэ Екатерина Романова салайар. Дьааҥыга ыытыллар Олоҥхо Ыһыаҕын тэрээһиннэрин өрөспүүбүлүкэҕэ ааттаах-суоллаах култуура туйгуннара, "Гулун" хотугу норуоттар үҥкүүлэрин ансаамбылын салайааччы Любовь Никитина уонна аатырбыт "Эрэл" үҥкүү ансаамбылын салайааччы Сима Толстякова режиссердаан туруоруохтара.

Онон бу күннэргэ дьааҥылар эһиил ыытыллыахтаах Олоҥхо ыһыаҕар бэлэмнэнии үлэтин номнуо саҕалаатылар.