Бу күн сарсыарда 11 чаастан Олоҥхо Дьиэтин сыбаайатын үөрүүлээх быһыыга-майгыга түһэрии буолла. Бу баараҕай тутуу олоҥхо киэҥ өйдөбүлүн дьоҥҥо-сэргэҕэ тиэрдэрин таһынан, сэлиэнньэ үөрэнээччилэрэ үөрэнэр-сайдар кииннэринэн буолуоҕа. Бастакы сыбаайа түһүүтүн Хатылыттан А. Федоров алгыс тылынан арчылаата. Салгыы улуус баһылыга А. Ноговицын, үөрэх управлениетын начальнига Т. Павлова эҕэрдэ тыл эттилэр. Үйэлээх, кэрэ көстүүлээх тутуу сэлиэнньэбит килбэйэр киинигэр дьэндэйиитэ улуус олохтоохторун барыларын да үөрүүтэ, кэтэһиитэ буоллаҕа.

Салгыы улуус баһылыга солбуйааччыларын кытта ыһыахха бэлэмнэнии хаамыытын кытта билсэ тэрилтэлэринэн, тутууларынан сырытта. Маҕаайы алааһыгар үлэ-хамнас тэрээһиннээхтик саҕаламмыт. Ол курдук, сэлиэнньэ баһылыга С. Саргыдаев салалтатынан түөлбэлэргэ анаммыт 7 балаҕан тутуута саҕаланан, 2 балаҕан акылаата түспүт. Манна «Центрстройгаз» тэрилтэ бэдэрээтчит быһыытынан үлэни сүрүннүүр. Көрөөччүлэр олорор сирдэрин тутарга ылсыбыт «Грант» СК тэрилтэттэн Н. Башарин үлэтин хамыыһыйаҕа билиһиннэрдэ. Тутууга биир сүрүн миэстэни ылар олохтоох МУПК тэрилтэ салайааччыта В. Попов муус устар ый ортотуттан үлэтин саҕалыырын эттэ.

Ыһыахха кэлбит ыалдьыттары тоҕус балаҕаҥҥа сырытыннаран, онно анал экспозицияны туруоран, улууспут историятын кэрчик кэмнэринэн билсиһиннэриэхпит. Бу үлэ төһөлөспүтүн билсэ, арҕаа түөлбэ олохтоохторун көрсө, улуустааҕы гимназия балаҕаныгар тиийэбит. Арҕаа түөлбэлэр салайааччылара, актыыптара кыттыылаах бэрт сэргэх кэпсэтии буолла. Кинилэр балаҕаннарыгар суруйааччылар сыһыарыллыбыттар, онон үлэ-хамнас онно матырыйаалы хомуйууга, оҥорууга түмүллэр.

Түөлбэ салайааччыта Ф. Седалищева 2 000 сибэкки номнуо рассадаланан, аны көҕөрдүүгэ үлэ ыытыллыаҕын эттэ. Нидьили түөлбэ салайааччыта К. Харитонова Олоҥхо ыһыаҕынан түөлбэтигэр сквер оҥорор былааннаах, ол курдук, хайы-үйэ 9 баннеры оҥотторон, бу скверин сайын сибэккинэн симээн, Олоҥхо ыһыаҕын көрсөргө бэлэмин үөрэ-көтө иһитиннэрдэ.

Биир улахан балаҕаны орто оскуола тутуохтаах. Маныаха, оскуола дириэктэрэ Н.Уарова эппитинэн, үлэ-хамнас кулун тутартан саҕаламмыт. Хамыыһыйа сылдьыытыгар урукку остолобуой көтүрүллэн, онно тиэхиникэ быыстала суох үлэлиирэ.

Салгыы «Олоҥхоҕ-старт» хамыыһыйата бу күн спорт уонна физическэй култуура институтун үлэһиттэрин кытта көрүстэ. Кэпсэтиигэ Олоҥхо ыһыаҕа эрэ буолбакка, Улуу Кыайыы күнүн бэлиэтээһиҥҥэ тус санаалар этилиннилэр.

Иккис бөлөх Олоҥхо ыһыаҕар кэлбит ыалдьыттары түһэрэр, хоннорор сирдэргэ сырытта. Үгүс боппуруоһу миэстэтигэр дьүүллэстилэр, ырытыстылар.

Бу сырыылар түмүктэринэн, киэһэ 5 чаастан Олоҥхо ыһыаҕын хамыыһыйаларын уопсай мунньаҕа ыытылынна. Ханна бытаарыы баарын, ханна уустуктар баар буолуохтарын тула аһаҕас кэпсэтии буолла. Мантан ыла хас биирдии тэрилтэ, үөһэттэн ыйыыны кэтэспэккэ, үлэҕэ тэтимнээхтик, эрчимнээхтик ылсарыгарэтилиннэ.