«Олоҥхо ыһыаҕа» этно култуурунай, сиэр-туом комплексын генеральнай былаана оҥоһуллан бүттэ», - диэтэ Хаҥалас баһылыга  Юрий Зайцев.

Кини эппитигэр тирэҕирдэххэ, ыһыах сиригэр саҥа 25 эбийиэк тутуллуоҕа. Үлэ кулун тутартан ыла саҕаламмыт. 8 индивидуальнай предприниматели кытта уонна 1 хаарчахтаммыт эппиэтинэстээх тэрилтэни кытта дуогабар түһэрсиллибит. Кинилэр 25 мөл 563 тыһ.солк. суумалаах үлэни толоруохтара. 18 эбийиэги тутууга үп-харчы олохтоох бюджеттан көрүллүбүт. Ону таһынан хотой бэлиэтин туруорууга, палаточнай городогу тупсаран оҥорууга үп-харчы анаммыт. Бүгүҥҥү туругунан үлэ иһин 13 мөл 500 тыһ. солк. төлөннө», - диэтэ кини.

Нөмүгүгэ ипподрому тутарга: кумаҕы кутарга 1 мөл. солк. бэриллибит, саҥалыы оҥорууга тыа хаһаайыстыбатын министиэристибэтэ 2 мөл. солк. көрбүт.

Ыһыах ыытыллар сирэ хааччыллыылаах буоларыгар 250 тыһ.солк., уу тиһигин тардарга 1 мөл. солк. анаммыт. Дьон тоҕуоруһар сирэ күн аайы ыраастаныаҕа. Күргүөмнээх тэрээһиннэр барар сирдэригэр урналары, контейнердары туруоруохтара. «Контейнердары атыылаһарга Покроскайдааҕы салайар компаниялары кытта кэпсэтии бара турар. Бөҕү-саҕы улуус ыраастыаҕа», - диэтэ баһылык.

1 км 350 м уһуннаах 6-9 КВТ кыамталаах уот линията тардыллар. Бу уопсай суумата 4 мөл 411 тыһ.солк.

Ыһыахха сиэр-туом ыытыллар сирэ, атыы эрээттэрэ, нэһилиэктэр уонна тэрилтэлэр түһүлгэлэрэ тутуллуохтара, суол бэлиэлэрэ туруоруллуохтара.

Ыһах кэмигэр бэс ыйын 18-21 күннэригэр суол 49-с км 51 км диэри тырааныспар айанын түргэнэ 40 км час диэри, 3,5 тонналаах тырааныспар сырыыта быстах кэмҥэ хаарчахтаныаҕа.

Ыһыах кэмигэр массыына тохтуур 4 сирэ тэриллиэҕэ. Бырааһыннык кэмигэр 1,4 №-дээх тохтобуллартан ыалдьыттары босхо таһыахтара.

9:00-тан 22:00 чааска диэри Дьокуускайтан Покровскайга диэри хас 30 мүнүүтэ аайы автобустар сылдьыахтара. Айан төлөбүрэ быһа холуйан 100 солк. быһыллар.

Бэлиэ күннэргэ Покровскайга, Орто дойдуга гостиницалар үлэлиэхтэрэ.

Мунньах кэмигэр тэрээһин култуурунай уонна спортивнай бырагыраамаларын дьүүллэстилэр. Үгэс буолбут республикатааҕы куонкурустар, испиктээкиллэр, быыстапкалар, омук оонньуута, кэнсиэр, о.д.а. тэрээһиннэр ыытыллыахтара.