- «Сахателеком» Чурапчы улууһунааҕы сыаҕын дириэктэрэ С.Д. Васильева улуус баһылыгар А.Т. Ноговицыҥҥа, сибээс миниистиригэр А.И. Борисовка тэрилтэ үлэтин, оптоволокно ситимэ холбонон, нэһилиэк олохтоохторо Интернет, телевидение өҥөтүнэн туһана олороллорун билиһиннэрдэ.
- Улуус баһылыга Андрей Ноговицын: «Чурапчы сиригэр-уотугар оптоволокно ситимэ холбонон үлэлээн эрэриттэн, өр кэтэспит күммүт үүммүтүттэн биһиги олохтоохтор истиҥник үөрэбит. Итини этэн тураммыт, республикабыт Ил Дарханыгар Егор Борисовка уонна Правительство бэрэссэдээтэлигэр Галина Данчиковаҕа, миниистирбитигэр Александр Борисовка, ону тэҥэ ситими тардыбыт “Сахателеком” үлэһиттэригэр, Алексей Семеновка, кини коллективыгар үөрэн-көтөн тураммыт махтанабыт», - диэтэ.
- Миниистир Александр Борисов: «Үтүө-мааны Чурапчы олохтоохторо, эһигини министиэристибэ уонна сибээс оператордарын ааттарыттан Чурапчыга оптоволокно ситимэ кэлбитинэн итиитик-истиҥник эҕэрдэлиибин! Бу ситиммантан салгыы Магадан диэки ааһыаҕа, онон федеральнай трасса таһынааҕы нэһилиэктэри барыларын хабыаҕа. Чурапчы киинигэр иккис операторы үлэлэтиэхпит, манна туспа оптоволокно тутуллуоҕа. Бу магистраль кэлбитинэн барыта үчүгэй буолла дии саныыр сыыһа, эбии линиялары уларытыы, тупсарыы үлэтин ыытыахха сөп этэ. Кыра нэһилиэктэргэ оптоволокнону киллэриэхпит. Суотабай сибээс өттүгэр эмиэ саҥа технологиялары туһаныахпыт».
- Өр сыллаах, үтүө суобастаах үлэтин иһин Марта Иннокентьевна Дьячковская “СР сибээһин бочуоттаах үлэһитэ” үрдүк аат иҥэрилиннэ.Инженер Кузьма Семенович Алексеев “Оройуон сайдыытыгар кылаатын иһин” үһүс степеннээх анал бэлиэнэн, Н.С. Флегонтова, Н.Д. Дьячковская бочуотунай грамоталарынан наҕараадаланнылар. Маны сэргэ, бу 97 км уһуннаах линия тутуута саҕаланыаҕыттан бүтүөр диэри хонтуруоллуур үлэни тэрийэн ыыппыт инженер Г.Р. Дьяконовка, электромонтер И.Д. Сивцевкэ, суоппар К.Д. Васильевка “Сахателеком” тэрилтэ Махтал суруга туттарылынна.
- «Ростелеком» ААО филиалын дириэктэрэ А.В. Семеновоптоволокно ситимэ 2017 сылга диэри Төлөй, Хоптоҕо, Арыылаах, Толоон, Килэҥки, Сылаҥ, Хатылы, Одьулуун, Алаҕар, Болтоҥо нэһилиэктэригэр киирэрэ күүтүллэр диэн иһитиннэрдэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети