Егор Борисов Чурапчы улууһугар оробуочай сырыыта

Кытаанах нэһилиэгэр Егор Афанасьевич саха народнай суруйааччыта Василий Яковлев-Далан аатын сүгэр олохтоох оскуола 100 сааһын бэлиэтиир үөрүүлээх тэрээһинигэр сырытта, суруйааччы Василий Яковлев-Далан бюһун арыйыы долгутуулаах түгэнигэр кытынна.

Эҕэрдэ тылыгар нэһилиэк үөрэҕин кыһата улууска эрэ буолбакка, бүтүн Саха сиригэр үөрэхтээһин сайдыытыгар дьоһун кылаатын бэлиэтээтэ, мантан куорсун анньынан тахсыбыт кыргыттар, уолаттар бүгүҥҥү Саха сирэ сайдарын туһугар норуот хаһайыстыбатын бары эйгэтигэр таһаарыылаахтык үлэлии-хамсыы сылдьалларын эттэ, олоҕун тосхолун түстэспит Василий Семенович сырдык аатыгар сүгүрүйэн туран, учууталын туһунан истиҥ-иһирэх тылынан аҕынна. “Кини миэхэ салайааччы буоларбар сүбэ-ама биэрбит ураты киһим. Кини этэн турар: Дьөгүөр, киһи эрэ буолларгын, бука диэн, норуотуҥ интэриэһинэн, республикаҥ интэриэһинэн салайтаран үлэлээтэххинэ охтон-өлөн биэриэҥ суоҕа диэн эппит тыллара миэхэ үйэ-саас тухары, олоҕум суолун устатын тухары сулус буолан сирдии сылдьалларыттан астынабын. Бу прициптэн, учууталым бу тирэх тылларыттан туораабакка үлэлии сылдьарбыттан киэн туттабын”, - диэн бэлиэтээтэ.

Саха Республикатын народнай худуоһунньуга, скульптор Петр Захаров айан оҥорбут Василий Яковлев-Далан боруонса бюһун суруйааччы огдообото Яна Викторовна Алехина, В.С.Яковлев махталлаах үөрэнээччитэ СР Ил Дархана Егор Борисов, Чурапчы улууһун баһылыга Андрей Ноговицын, Кытаанах нэһилиэгин баһылыга Иван Игнатьев дохсун ытыс тыаһын ортотугар арыйдылар, тыыннаах сибэкки дьөрбөтүн уурдулар.
Салгыы Егор Афанасьевич Улахан Күөл учаастакка оҕо саада-оскуола таас дьиэтин бастакы сваятын туруоруу үөрүүлээх түгэнигэр кыттыыны ылла.

Олохтоохтор оҕо уһуйаанын, оскуола тутуутун туруорсубуттара ыраатта, ону 2015-2016 сылларга тутар туһунан барыллаан кэпсэтии барбыта. Ону санатан туран, Егор Афанасьевич Улахан Күөл олохтоохторугар туһаайан ыччаты олохсутар, дьиэ-уот туттар, производствоны сайыннарар буоллаххытына, мин көмөлөһөргө бэлэммин диэтэ. “Манна төрөөбүт дойдугут патриоттара санаалаах дьон олороҕут, үлэни өрө тутан биһиги саҕалааһыннарбытын тиһэҕэр тиэрдэрдии үлэлээҥ-хамсааҥ”, - диэн санаатын тиэртэ.

Бу кэнниттэн Егор Борисов Макаровтар диэн элбэх оҕолоох эдэр ыалга ыалдьыттаата. Дьиэ кэргэн аҕа баһылыга Семен Семенович кэргэнинээн, оскуола үлэһитэ Эльза Борисовналыын алта оҕону – биэс уолу, биир кыыһы – күн сирин көрдөрөн иитэллэр. Онтон икки уол уонна кырачаан уоллаах кыыс -- игирэлэр. Дьиэ кэргэн аҕа баһылыга бааһынай хаһаайыстыбатын тэринэн биэс уон ынах сүөһүлээх, ону таһынан сылгылаах. “Чурапчы” тыа хаһаайыстыбатын кооперативын кытта дуогабардаһан биэс уон герефорд сүөһүнү ииппитэ иккис сыла буолбут. Егор Афанасьевич итии чэйдээх остуол тула олорон дьиэлээхтэри кытта сэһэргэстэ, үлэлэрин-хамнастарын, олохторун-дьаһахтарын туһунан токоолосто. Ил Дархан дьиэлээх хаһаайынтан Улахан Күөл эн санааҕар сайдар кэскиллээх дуо диэн ыйыппытыгар, Семен Семенович биһигин ыйаабыт сирин сарсыҥҥытыгар эрэнэрин, саҥа хочуолунай тутуллан, дьиэлэр кииннэммит ититэр тиһиккэ холбоммуттарын, онон олорор усулуобуйаны тупсарыыга болҕомто ууруллар буолбутун эттэ, ол туоһутунан быйыл манна икки ыал олохсуйардыы көһөн кэлбитин холобурдаата.

Бу күн Егор Афанасьевич Сылаҥҥа Георгий Башарин аатын сүгэр саҥа оскуола дьиэтин үөрүүлээхтик аһыы сиэригэр-туомугар кытынна. Дириэктэр Алексей Максимов арыаллааһынынан икки мэндиэмэннээх, аныгы ирдэбилгэ толору эппиэттиир, сахалыы тыыннаах сылаас, сырдык үөрэх кыһатын кылаастарын кэрийэн көрдө-иһиттэ, үөрэнээччилэри, учууталлары кытта сэһэргэстэ.
Оскуоланы бүтэрбит араас көлүөнэ дьон кыттыылаах бырааһынньык үөрүүлээх чааһыгар тутууну көҕүлээбит дьоҥҥо махтанна, оскуола саҥа дьиэтэ үлэҕэ киириитэ нэһилиэк, улуус социальнай-экономическай сайдыытыгар олугунан буолуоҕун бэлиэтээтэ.