«Россия регионнарын литературата» түһүмэххэ «Бичик» Национальнай кинигэ кыһата «Саха сирин норуодунай суруйааччылара» сериянан классиктары уонна «Поэтические голоса России» (нууччалыы, сахалыы тылынан хоһоон хомуурунньугун) таһааран дипломант үрдүк аатын ылла. Кыһа салайааччыта Август Егоров этэринэн, Алампаттан, Өксөкүлээхтэн саҕалаан саха классик суруйааччыларын айымньыларын 126 томун таһаарар былааннааҕыттан күн бүгүн 44 тома таҕыста. Анал сериянан бу дьоһун библиотеканы олохтуурга кэскиллээх этиини Саха сирин Суруйааччыларын сойууһун бэрэссэдээтэлэ, норуодунай поэт Наталья Харлампьева киллэрбитэ, бэчээттэнэр оҥкулун оҥорсубута. Үйэлээх хомуурунньукка киирбит аҕыйаҕа суох суруйааччыбыт Аҕа дойдуну өстөөх саба түһүүтүттэн көмүскүүр уоттаах сэриини ортотунан ааспыта. Онон, Улуу Кыайыы өрөгөйдөөх 70 сылыгар кинилэр өлбөт-сүппэт айымньыларын серията Кыайыы көтөллөнөн, Литература сылыгар бэйэтин суолун хаалларара ордук үөрүүлээх уонна долгутуулаах.
«Поэтические голоса России» серияны народнай суруйааччы Николай Лугинов көҕүлээн таһааттарар. Манна дойду араас муннугуттан төрүттээх поэттар айымньылара сахалыы, нууччалыы тылбаастанан тахсаллар.
Бүтүн Россия үрдүнэн 400 талыллыбыт бырайыактан 20-чэ бастыҥ кинигэ ахсааныгар сахабыт кинигэтэ киирбитэ дьоһун ситиһиинэн буолар, инниктин өссө саҥа үктэллэри дабайарга, саҥа саҕахтары арыйарга төһүү буолуоҕа.
Комментарии
Авторизация на сайте через социальные сети