Бу дьаһалы ойуур хаһаайыстыбатын федеральнай агентствота көҕүлээтэ. Дойду үгүс уобалаһыгар уонна регионугар, куоратыгар, нэһилиэнньэлээх пуунугар маһы олордууга субуотунньуктар ыытылыннылар.

Быйыл мас олордуута Аҕа дойду Улуу сэриитигэр Кыайыы 70 сылынан «Кыайыы ойуура» өрөспүүбүлүкэтээҕи акция чэрчитинэн барда. Бу күн нэһилиэнньэлээх пууннары, пааркалары уонна сквердэри ыраастааһыҥҥа уонна көҕөрдүүгэ элбэх киһи таҕыста.

СӨ Доруобуйа харыстабылын министиэристибэтин кэлэктиибэ бу акцияҕа актыыбынайдык кытынна. Министиэристибэ үлэһиттэрэ 3 тыһыынча курдук талаҕы уонна сэппэрээги Лермонтов уулуссатын кыйа олортулар. Онон «Строительнай» уокурукка киирсэр уулуссаҕа үс тыһыынча курдук маһы олортулар.

«Ойуур – планетабыт тыынар салгына. Онон биһиги ытык иэспитинэн ойуур барҕа баайын хаҥатыы эрэ буолбакка, киниэхэ харыстабыллаах сыһыаны иитии, айылҕаҕа сылдьыы культуратын тутуһуу буолар. Ону тэҥэ баһаар тахсар кутталын үөскэтиэ суохтаахпыт», – диэн СӨ доруобуйа харыстабылын миниистирин бастакы солбуйааччы Олег Припузов иһитиннэрдэ.

Орто дойдуга кэлбит хас биирдии киһи төрөөбүт дойдута күөҕүнэн силигилии үүнэрин ситиһиэхтээх уонна харыстабыллаахтык сыһыаннаһыахтаах.