Ыстаҥаҕа уонна мас тардыһыытыгар барыта 180 спортсмен кытынна. Россиятааҕы «Урожай» ДСО бэрэссэдээтэлин солбуйааччы Олег Смирнов күрэхтэһии ыҥырыылаах ыалдьыта буолла.
Ыстаҥаҕа, кылыыга уонна куобахха эр дьон ортотугар Уус-Алдан улууһун спортсмена Иван Пестряков тэҥнээҕин булбата. Оттон дьахталларга Чурапчыттан кыттыбыт СунГу Алексеева бастаата.
Эр дьон мас тардыһыытыгар 62, 74 ,90, 105 уонна 105 кг тахса ыйааһыҥҥа дьахталлар 56, 68, 82 уонна 82 кг тахса ыйааһыннарга арахсан күрэхтэстилэр. Эр дьоҥҥо Николай Апросимов, Михаил Ковалик, Виктор Докалов, Михаил Савватеев, Дмитрий Попов араас ыйааһыннарга кыһыл көмүс мэтээллэри ылары ситистилэр. Дьахталларга бастакы миэстэлэри спорт маастардара Екатерина Белолюбская, Туйара Орлова, спорт маастарыгар кандидаттар Мария Алексеева уонна Наталья Кирикова ыллылар.
«Модун» улахан саалатыгар кыайыылаахтары наҕараадалаатылар. Россиятааҕы «Урожай» ДСО бэрэссэдээтэлин солбуйааччы Олег Смирнов күрэхтэһии үрдүк таһымнаахтык ыытыллыбытыгар тэрийээччилэргэ махтанна. Омук спортивнай оонньуулара сайдалларыгар Дьокуускай суос-соҕотох киин буоларын кини бэлиэтээтэ.
Комментарии
Авторизация на сайте через социальные сети