«Конференцияҕа түөрт тас дойдуттан - Казахстантан, Кытайтан, Латвияттан, Украинаттан кытталлар. Ону таһынан ааттаах-суоллаах үрдүк үөрэх 15 кыһатыттан бааллар», - диэн СИА-ҕа эттэ физкультураҕа уонна спортка Чурапчытааҕы государственнай институт ректора Иннокентий Готовцев.

Николай Тарскай үтүө сабыдыалынан физическэй культура уонна спорт уопута үөскэтиллибитэ. Онон, конференция Саха сиригэр ыытыллыыта түбэһиэхчэ, ылбычча буолбатах.

«Биһиги ыалдьытымсах Нам сиригэр-уотугар кэлэн турабыт. Манна спорт 14 көрүҥэр олус үчүгэй күрэхтэһии буола турар. Региоҥҥа спорт сайдыытыгар ураты улахан болҕомто ууруллара харахха тута быраҕыллар», - диэтэ РФ спортка министиэристибэтин бэрэстэбиитэлэ  Григорий Кобельскай.

Конференция ылыммыт резолюцията РФ спортка министиэристибэтигэр, регионнар, муниципалитеттар салайааччыларыгар туһаайыллар. Онно элбэх этии баар, итилэр истэригэр спорт национальнай көрүҥнэрин киэҥник тарҕатыы, ГТО нуормаларын туттарыыга бэлэмнэнии, скандинавскай хаамыынан дьарыгы тэрийии, о.д.а.

2020 сылга диэри Россияҕа спордунан утумнаахтык дьарыктанар дьон ахсаанын нэһилиэнньэ 40 бырыһыаныгар дылы элбэтии, эбии соруга турар. Республикатааҕы спорт министиэристибэтэ эппитинэн, ити чэрчигэ үс улуус эппиэттэһэр кыахтаах. Горнай – 39%, Амма – 38,5%, Уус-Алдан – 37,5%.