Киэһэ «Илкит» культурнай-спортивнай кииҥҥэ быыбардааччыларын кытта көрсөн кэпсэттэ. Тэрээһиҥҥэ оройуон Сэбиэтин депутаттарын сэбиэтин бэрэссэдээтэлэ З.Д. Григорьева, оройуон дьаһалтатын баһылыгын бастакы солбуйааччы С.Г. Илларионов, Өлөөн национальнай нэһилиэк олохтоох дьаһалтатын баһылыга В.Н.Романов сырыттылар.

Госдума депутата Федот Тумусов быыбардааччыларга Россияҕа бара турар экономическай уонна политическай реформалары, дьон-сэргэ олоҕо туруктаах буолуутун хааччыйыыга Госдума ылынар сокуоннарын олоххо киллэриигэ ыытыллар араас хабааннаах үлэни билиһиннэрдэ, комитетын үлэтин сырдатта. Чуолаан доруобуйа харыстабылыгар, тулалыыр эйгэни харыстааһыҥҥа, хотугу аҕыйах ахсааннаах төрүт норуоттар төрүт дьарыктарын харыстыырга, сайыннарарга туһуламмыт сокуоннары уонна уураахтары бэлэмнээһиҥҥэ ыытар үлэтин билиһиннэрдэ.

Кини үлэлиир комитета дойду олохтоохторо наадалаах эминэн хааччыллалларын ситиһэр инниттэн РФ фармацевтическай промышленноһа туруктаахтык үлэлиирин хааччыйар сокуоннары оҥорон, бэйэ оҥорон таһаарар эминэн хааччыйыы 50-чэ бырыһыаҥҥа тиийбитин иһитиннэрдэ.

Хотугу оройуоннарга олох таһымын үрдэтэри, хотугу аҕыйах ахсааннаах норуоттар төрүт дьарыктарын чөлүнэн хаалларары, айылҕа ресурсаларын сөптөөхтүк туһанары хааччыйар сокуоннарга үлэлэһэрин эттэ. Ол курдук, Аллараа Халыма оройуонугар оробуочай сырыытын кэмигэр олохтоохтор балыгы бултааһыҥҥа хааччахтааһыннар киирбиттэрин эппиттэрин, федеральнай таһымҥа туруорсан, сокуон икки барылын оҥорон киллэрэн уонна балыктааһын боппуруоһугар федеральнай агентствоны кытта үлэлэһэн, хоту сир олохтоохторугар аһылыктарыгар балыктааһын көҥүллэммит.

Кыыл табаны бултааһыҥҥа урут ылыллыбыт «Булт уонна булт ресурсаларын туһунан» сокуоҥҥа олохтоох усулуобуйа ситэ учуоттамматаҕынан, быыбардааччылар туруорсууларынан ону көннөрөр инниттэн сокуон икки барылын уонна биир РФ Правительствотын уурааҕын барылын оҥорон дьүүллэһиигэ киллэрбитин иһитиннэрдэ.

Федот Семенович алта уон биэс депутаттаах «Сиэрдээх Арассыыйа» партия Госдумаҕа фракциятын солбуйар бэрэссэдээтэлинэн талыллан үлэтэ уонна эппиэтинэһэ улааппытын эттэ.

Өлөөн сэлиэнньэтин быыбардааччыларын кытта икки чаастан ордук кэмҥэ барбыт көрсүһүүгэ хотугу дойду олохтоохторун, аҕыйах ахсааннаах норуоттар бырааптарын көмүскүүр сокуоннары ылыныыттан саҕалаан промышленнай тэрилтэлэр оройуон, аҕа ууһун общиналарын сирдэригэр-уоттарыгар үлэлээһиннэрэ, Арктическай оройуоннары чуолкайдааһын, о.д.а. боппуруостар дьүүллэһилиннилэр. Саха Өрөспүүбүлүкэтин бочуоттаах тутааччыта Э.А. Еремеев, хотугу аҕыйах ахсааннаах төрүт норуоттар оройуоннааҕы ассоциацияларын бэрэссэдээтэлэ Н.В. Бенчик, үлэ бэтэрээнэ А.В. Белолюбская, чааһынай предприниматель С.Н. Николаев, «Почта России» оройуоннааҕы салаатын салайааччыта У.К. Павлова, тутуу үлэһитэ А.Н. Винокурова, үлэ бэтэрээнэ К.Г. Киреева, кырдьаҕастар оройуоннааҕы «Ытык» сүбэлэрин «Осикта» бэрэссэдээтэлэ Н.М. Стручков, «Аллараа Өлүөнэтээҕи» хампаанньаҕа вахтаҕа үлэлээччи А.И. Гуляев, оскуола үлэһитэ Г.А. Константинова, тыыл бэтэрээнэ В.В. Семенова, Өлөөн эбэҥки национальнай оройуон депутаттарын Сэбиэтин «Суглан» бэрэссэдээтэлэ З.Д. Григорьева кэпсэтиигэ кыттан тыл эттилэр.

Оройуон олохтоохторо РФ Госдуматын депутата Федот Тумусов үлэтин биһирииллэрин биллэрдилэр. Түмүк тылыгар Федот Семенович нэһилиэнньэттэн киирбит этиилэри ырытан, учуоттаан толорууга, хонтуруолга ылан үлэлэһиэҕин эттэ.