Республика Президенэ Саха сирин салалтата саҥа 2014 сыллаахха хотугу территорияларга ураты болҕомто уурарга эппитэ. «Арктическай оройуон олохтоохторо республика былаастарыттан бэйэлэригэр болҕомтону кырдьыктаахтык туруорсаллар», – диэбитэ регион баһылыга.

Бүгүн, тохсунньу 28 күнүгэр, Ил Түмэҥҥэ Арктика уонна Хоту олохтоох аҕыйах ахсааннаах омуктар кыһалҕаларыгар сис кэмитиэт бэрэссэдээтэлэ Елена Голомарева уонна республика тыа хаһаайыстыбатын уонна аска-үөлгэ политикаҕа миниистирэ Иван Слепцов табаһыттан хамнастарын туһунан кэпсэттилэр, диэн парламент пресс-сулууспата иһитиннэрэр.

Елена Голомарева табаһыттары өйүүргэ социальнай хайыскхалаах кэлим үлэ ыытыллара эрэйиллэр, онно туох-ханнык иннинэ хамнаһы үрдэтии быһаарыллыахтаах диэтэ. Табаһыттар хамнастара намыһаҕыттан салаа кадр боппуруоһугар ыарахаттары көрсөрө кистэл буолбатах – ыччат табаһыттыы барбат.

Кини үбүлээһин чопчу хамсааһына баар буолуохтаах, онно кэм ирдэбилин хаттаан көрүөххэ наада диэтэ. Ону таһынан народнай депутат биир ыстаадаҕа 13 табаһыт баар буолуохтааҕын туруоруста.

Иван Слепцов тыа ха6аайыстыбатын Министерствота туруоруллубут боппуруостары бы6аарыыга үлэлиир диэтэ. «Табаһыттар хамнастарын 20 тыһыынча солкуобайга тиэрдэр былаан баар», - диэтэ миниистир.

Итини таһынан Елена Голомарева ыстаадалары балаакка матырыйаалларынан, радиостанцияларынан, спутниковай навигатордарынан, оттугунан хааччыйыыны, сыл түмүгүнэн үчүгэй көрдөрүүлээхтэри граннарынан биһирэтиини туруоруста.

«Сокуоннар үлэлииллэрин ситиһэргэ муниципальнай тэриллилэргэ программа ылыныахха наада. Арктика Сылын ситимнээн үгэс буолбут төрүт салааларга муниципалитеттар өттүлэриттэн дьоһуннаах болҕомто эрэйиллэр», - диэтэ Елена Голомарева.