Маннык түһүлгэҕэ би­һиги бөҕөстөрбүт сыл аайы кытталлар гынан баран, бүтэһигин 2010 сыллаахха Виктор Лебедев 55 киилэҕэ үһүс миэстэҕэ тиксэн турар. Онтон ыла үс сыл, этэргэ дылы, ыт атаҕын тутан хаалбыппыт. Ол эрээри кэнники кэмҥэ тустуу сайдыытыгар уларыйыылар киирэннэр, итэҕэстэри-быһаҕастары туоратыыга үлэлэр ыытылланнар, саҥа талыллыбыт тренердэр сөптөөх суолу тобуланнар, быйылгы түһүлгэҕэ бөҕөстөр биһигини үөртүлэр.
Саамай эрэнэр бөҕөс­пүт, Россия 3, аан дойду 2 төгүллээх чемпиона, спорт үтүөлээх маастара Виктор Лебедев Красноярскайга барыах эрэ иннинэ санныгар улахан эчэйии ылан, кыттара-кыттыбата биллибэт этэ. Уолбут эрдэттэн кыттарга оҥостубут киһи быһыытынан хорсун санаатын ылынан көбүөргэ таҕыста эрээри, эчэйиитин бэргэтэн – кыаҕын толору туһаммата. Бастыҥ бөҕөспүт тэлэн биэрбит суолун туһанан Чурапчы ыччата Владимир Флегонтов финалга тахсан, Рустам Ампарга төһө да аҥардастыы алта баалы биэрдэр, үчүгэй өйдөбүлү үөскэттэ. Итинэн кини турнир балаһыанньатын быһыытынан, кулун тутарга АХШ-ка ыытыллар аан дойду кубогар кыттар Россия хамаандатын састаабыгар киллэрилиннэ.
Бу иннинэ күттүөнэ суох көрдөрүүлээх Николай Ноев дьиҥнээх байыастыы характердааҕын көрдөрөн, үһүс бириистээх миэстэҕэ таҕыста. Ордук кини Россия чемпионатын призера Расул Машезовы уонна эдэрдэргэ аан дойду түһүлгэтин призера Исмаил Мусукаевы кыайыыта сэҥээриини ылар.
Иккис ыйааһыҥҥа (61 кг) Россия студеннарга чемпиона буола сылдьыбыт Егор Пономарев уонна ыарахан ыйааһыҥҥа тустубут Азия икки төгүллээх призера Айаал Лазарев бэһис миэстэҕэ тахсан эмиэ хайҕаныахтарын сөп. Манна сыһыары тутан эттэххэ, оруобуна бу кэмҥэ ыытыллыбыт Кыргызстан чемпионатыгар Иннокентий Иннокентьевпыт бастакы миэстэни эрэллээхтик ылан, баһылыыр оруолун чиҥэппит.
Түмүктээн эттэххэ, үс сыллаах тохтобул кэнниттэн тустууктарбыт икки мэтээли ылыылара улахан сэргэхсийиини үөскэттэ итиэннэ аны сайын Туймаада туонатыгар тэлгэнэр Россия көбүөрүгэр киирсиэххэ сөп эбит диэн санааны укта. Тренерскэй састаап үлэтэ сөптөөх суолунан баран иһэрэ көһүннэ.
Бу турнир, саха дьоно тустууну таптыылларын, тустууга сүгүрүйэллэрин өссө төгүл көрдөрдө. Бары биир санаанан, бэйэ-бэйэни өйөһөн, өрөйөн-чөрөйөн сырыттахпытына эрэ ситиһии кэлэрин умнумуоҕуҥ.

Хаартыскаҕа: турнир иккис призера Владимир Флегонтов.