Мин нэһилиэккэ тыа хаһаайыстыбатын испэ­сэлииһинэн үлэлиир Игорь Саввиновы кытта кэпсэтэбин. Игорь Николаевич быйыл сайын Чуйут диэн сиргэ (оттуур ходуһа үрдүгэр, сискэ) бөрө үс оҕону төрөппүтүн кэпсиир. Анал биригээдэ тэриллэн, бу сиэмэхтэри бултаспытын түмүгэр, иллэрээ күннээҕи чахчынан, бөрөһүттэр биэс адьырҕаны сууһарбыттар.

— “Буранынан” сылдьан бултууллар. Петр Антонов – 2, Николай Егоров – 2, Альберт Матвеев 1 бөрөлөөхтөр. Элбэх киһи эргийиитин, күөйүүтүн түмүгэр, үс бөрөнү саанан ытан өлөрдүлэр. Икки хапкааҥҥа хаптарбыта. Биир бөрө хапкааны чэҥкээйилэммитинэн куота сылдьар. Сабаҕала­а­һынынан, өссө да үс бөрө дэриэбинэ чугаһыгар сылдьар.
Тыа хаһаайыстыбатын испэсэлииһэ бөрөлөр быйыл сайыҥҥыттан аҕыс сылгыны тардыбыттара чопчуламмытын эттэ. “Оттон улууска уон аҕыһы тардыбыттар”, — диир.

Сууһарыллыбыт ардай аһыылаахтартан иккитэ тыһы. Тыһы бөрө сылгыны тардарын таһынан, өссө төрүөҕү биэрэр. Онон булчуттар утуйар да ууларын аахсыбакка, көҥүл айбардыыр адьырҕалардыын тохтообокко “охсуһаллар”.
Түгэнинэн туһанан, нэһилиэнньэ Ньурба оройуонун тыа хаһаайыстыбатын департаменыгар (сал. Александр Эверстов) уонна нэһилиэктэрин дьаһал­татыгар (баһылык Юрий Васильев) булчуттарга уматыгынан көмөлөспүттэригэр махтаналлар.
«Саха сирэ» хаһыат суруналыыстара быһаччы бултаабыт дьону булан сибээскэ таҕыстыбыт.

Альберт Матвеев, ГАУ «Центрлес» Күндээ­дэтээҕи үлэһитэ, «Саха сиригэр» анаан телефонунан кэпсээтэ:
— Ити хаартыскаҕа көстөр бөрөнү ааспыт бээтинсэҕэ бултаатыбыт. Бырааппын Григорийы (хаартыскаҕа) кытта бэһис сылбытын анаан бултуубут. Улахан кыыл буолан сүрдээх интэриэһинэй, киһи кыдьыгырар эбит. Дьиэ таһыгар 1 км эрэ сиргэ арыы тыаҕа кирийэн сытарын быраатым суоллаан булбута. Маҥнай үс “Буранынан” арыы тыаны эргийэ сүүрдүбүппүт. Нэһилиэктэн дьону таһааран төгүрүйбүппүт. Бастаан мин ыппытым, табыллан баран Егоров Семен диэн уолга тиийэн охтубута. Доруоп сааларга картечь ботуруоннары уктубуппут.

— Бөрөнү өлөрбүт д­ьон, ханнык эмэ бириэмийэни ылаҕыт дуо?
— Федеральнай үп 25000 солк., улуустар 10000 биэриэхтээхтэр этэ. Улуустар харчыларын икки сыл буолан баран нэһиилэ ылбыппыт, биэс бөрөҕө. Күндээдэҕэ өссө атын биригээдэ баар — Николай Егоров уонна Петр Антонов кыттыһан хас да бөрөнү ыллылар.

Салгыы быраата Григорий Матвеев кэпсиирин истиэххэ:
— Туртас тутан баран арыы тыаҕа киллэрэн сии сытара. Аһара тот буолан нэһиилэ хамсанар курдуга. Маҥнай өссө хараҕа уонна кулгааҕа эрэ быгар гына хаарга хастан саһан сытара. Наһаа өйдөөх кыыл. Үүрэн таһаарбытым. Түөртэ-биэстэ ытан өлөрбүттэрэ. Икки саастаах тыһы бөрө эбит, уулааҕа биллибэт.

— Ити эргин бөрөлөр өссө бааллар дуо?
— Үрэх Бүлүү өрүскэ түһэр туһунан баар Дьаархан күөл (Күндээдэттэн 30 км. ыраах) эргин сылдьар. Ол тыһы бөрө үһүс сылын ситтэрбэккэ сылдьар. Ол бөрө төрүөх биэрэн эрэйи көрдөрөр.

Хаартыскаҕа: бөрөһүт Григорий Матвеев.