Ол курдук бу кулун тутар ыйга сүрдээх интириэһинэй ис хоһоонноох “Аммаҕа аат ааттаан” диэн сүгүрүйүү ааттаах саҥа кинигэ ааҕааччы киэн араҥатыгар ананан таҕыста. Бу кинигэ ис тутулун кыратык сэгэттэххэ: ааптар бэйэтэ суруйбут киирии тыллаах, “Аммалар үтүө сабыдыалларынан”, “Амма ахтылҕаннаах алаастарынан”, “Амма буойун уолаттара”, “Күннүк Уурастыырап онтон да атыттар”, “Аммаҕа алтыспыт айар куттаахтарым” диэн түһүмэхтэрдээх. Онно эбии суруллубуту киэргэтэр Амма өрүс кэрэ айылҕатын хаартыскалара, араас кэмҥэ Иннокентий Сосины кытта алтыспыт доҕотторун мөссүөннэрэ.

Кинигэ “Сайдам” издательствоҕа оҥоһуллан 500 эрэ экземплярынан таҕыста. Көмөлөспүт “Амма улууһа” МР баһылыгар А.Артемьевка, урбаанньыт Л.Куприяноваҕа, Е.Пестерев дьиэ кэргэттэригэр, П.Емельяноваҕа, Н.Захаровка уонна Е.Аманатоваҕа Иннокентий Михайлович кыргыттара Д.Захарова уонна О.Сосина махталлара улахан.

“Дьэ холбоон-илбээн, таптыыр, ахтар Аммам дьонун-сэргэтин туһунан ахтыы аҥаардаах кыракый кинигэбин бэчээккэ бэлэмнээтим. Кинигэ ааспыт үйэ иккис аҥаарыгар олоро сылдьыбыт айар үлэнэн дьарыктаммыт үтүө дьонун-сэргэтин сырдык өйдөбүллэригэр ананан сурулунна”, - диэн киири тылынан ааптар түмүктээбит. Оттон бу кыра кинигэни билсиһиннэрэр ыстатыйабын Иннокентий Сосин 1984 сыллаахха суруйбут хоһоонунан түмүктүүбүн:

Аммаҕа аат ааттаан хайгыыбын
Айылҕа сыдьаайар сырдыгын,
Астына, манньыйа саныыбын
Амма кыыс дуоһутар тапталын...

И. Сосин Суола-Моорук нэһилиэгэр төрөөбүт, Мэҥэ Хаҥалас улууһун, Майа сэлиэнньэтин, Моорук, Тараҕай, Уус Алдан Мүрү нэһилиэктэрин бочуоттаах олохтооҕо, СР культуратын үтүөлээх үлэһитэ, СР бочуоттаах кырдьаҕаһа, ветерана.