Кинигэҕэ Иннокентий Пестряков араас кэмҥгэ айбыт 1246 үлэтэ темаларынан наарданан киирбиттэр. Искусствоведение кандидата, СР искусствотын үтүөлээх деятелэ, Россия Худуоһунньуктарын союһун чилиэнэ Покатилова Ия Володаровна "Загадочная душа бытописца Иннокентия Пестрякова" диэн киирии тылы суруйбут. Маны сэргэ, М.А. Охлопков аатынан Хатырыктааҕы библиотека сүрүннүүр библиотекара, СР култууратын туйгуна Е.А. Дьяконова биир дойдулааҕын — И. Ю. Пестряков туһунан суруйбут "Атын кэм киһитэ" хоһооно, "Оҕом туһунан" диэн аҕата Юрий Петрович уонна "Умнуллубат дьоллоох күннэрим (кэргэним Лэгэнтэй Бэстэрикиэп туһунан ахтыы)" диэн кэргэнэ Варвара Пестрякова ахтыылара, худуоһунньук хартыыналарын быыстакаларын испииһэктэрэ, кини үлэлэрин быыстапкатын туһунан дьон-сэргэ сыанабыла, санаата, худуоһунньук ситиһиилэрэ, переодическай бэчээккэ таһаарбыт үлэлэрэ, «Эр киһи буоллаҕым» диэн Иннокентий Песряков бэйэтин хоһооно, кини туһунан периодическай бэчээккэ тахсыбыт матырыйааллар испииһэктэрэ, «Таһаарааччыттан» диэн ааптар Геннадий Тимофеевич суруйуута киирбиттэр.

Бу бэртээхэй кинигэҕэ сыһыарыы быһыытынан П.И. Сивцев аатынан история уонна этнография музейын кино-видео архыыба (таҥааччы С.Г. Дьяконова) «Саха» НКИК Намнааҕы филиала устубут видиосюжеттарыттан бэлэмнээбит «И.Ю. Пестряков сэһэргиир» диэн DVD диискэ оҥоһуллубут.

Маннык дьоһун кинигэ күн сирин көрөрүгэр «Нам улууһа» МТ (баһылык Александр Атласов), «Хатырык нэһилиэгэ» МТ (баһылык Алексей Пинигин), СР Ил Түмэнин депутаттара — Николай Румянцев, Алексей Еремеев, СР Култууратын уонна духуобунаһын министиэристибэтэ, «КопирТехСервис» генеральнай директора Александр Никифоров, И. Пестряков аҕата Юрий Пестряков, кэргэнэ Варвара Пестрякова уо.д.а. күүс-көмө буоллулар. Кинилэри сэргэ, кинигэ ис тутулун оҥорууга, матырыйааллары булууга, бэрийиигэ улууспут музейын үлэһиттэрэ, кыраайы үөрэтээччилэрэ А.И. Копирын, И.З. Кривошапкин, В.Д. Попова, Р.Л. Федоров, С.Г. Дьяконова, Хатырыктааҕы Государственность музейын уонна улуустааҕы киин билиотека үлэһиттэрэ үлэлэстилэр.

Ааптар Геннадий Степанов туох санааттан бу кинигэни таһаарарга ылсыбытын туһунан бу курдук сэһэргиир: «Иннокентий Пестряков биир уратыта диэн кини саха уруһуйдьуттарыттан бастакынан кэпсээнинэн уруһуйдары (комикстары) оҥороро. Иккиһинэн, кини дьэрэкээн ойууларыгар, мындыр оһуордарыгар эргиллэн кэлэ тураҕын. Оннук ураты умнуллубат угуйар күүстээх. Бу улахан талаан чаҕылхай бэлиэтэ. Биир бэйэбин Иннокентий Пестряков чаҕылхай үлэлэринэн сөхтөрбүтэ, хоту дойду тыйыс уолун уйадытан бу кинигэни оҥорорбор кынаттаабыта. Кини бэчээккэ тахсыбыт уруһуйдарын көрөөт, олус сөбүлээбитим. Сырдык талаанын, мындырдык саха олоҕун таба көрөн, дириҥник үөрэтэн, барытын ымпыктаан-чымпыктаан ойуулуурун көрбүт эрэ киһи сэргээбэт буолуон хайдах да сатаммат!».