Алтан нэһилиэгин баһылыга Д.Н. Григорьев бу курдук сэһэргиир: «Биһиги Алтаммытыгар 1989 сыллаахтан саҕалаан талааннаах биир дойдулаахпытыгар анаан «Мин дууһам ыллыыр»диэн өрөспүүбүлүкэтээҕи  ырыа күрэхтэрэ ыытыллар буолбуттара. Быйыл Валерий Ноев 75 сааһын туолуута улууспут үрдүнэн биллэриллибит култуура уонна духуобунас сылыгар сөп түбэстэ. Ол курдук Валерий Ноев аатын үйэтитэн, кини сырдык аата умнуллубатын кэрэһилээн, улууска, нэһилиэккэ үгүс тэрээһиннэр ыытылыннылар. Онно дьон дьоһуннук турунан, айар элбэх талааны арыйдылар.

2009 сыллаахха күн сирин көрбүт ырыанньык бастакы таһаарыыта тута тарҕанан, дьон – сэргэ биһирэбилин ылыан ылбыта. Бар дьоммутугар сырдык санаанан салайтаран, бу дьоҕус кинигэни, эбии матырыйаалынан ситэрэн-хоторон, иккистээн таһаараран бэлэх гынан уунарга быһаарынныбыт».

Бу ырыанньыгы доҕуһуоллуур доҕор, арылаллыыр аргыс оҥостон, Валерий Ноев истиҥ-иһирэх иэйиилээх ырыаларыгар сүгүрүйэр дьон ахсаана  күнтэн күн элбии, эбиллэ турар. Кинилэр сыллар тухары сахалыы ырыа саргытын салайсан, үйэлэргэ ыллыы-туойа турдуннар!