Дьокуускайга Эдьиий Дора туһунан саҥа кинигэни билиһиннэрдилэр

Ахсынньы 3 күнүгэр П.А.Ойуунускай аатынан Саха театрыгар Эдьиий Дора үбүлүөйүгэр анаммыт Евдокия Иринцеева-Огдо «Эдьиий» диэн маллаах-иһиттээх кинигэ комплегын билиһиннэрии буолла. Бу олох араас түгэнигэр сиэри-туому хайдах тутуһары кэпсиир түөрт кыра сүбэ кинигэлэрдээх, үтүө санааны үксэтэр бүлүүһэлээх, алаһа дьиэни араҥаччылыыр күлүүһүнньүктээх, киһи ис туругун күүһүрдэр алгыстаах харысхаллаах бэртээхэй кинигэни «Бичик» кинигэ кыһата бэлэмнээн оҥордо.

Истиҥ-иһирэх тыыннаах дьоро киэһэни СР Президенин государственнай сүбэһитэ Андрей Борисов иилээн-саҕалаан ыытта.

Бу айылҕа дьикти күүһүн арыйар кистэлэҥнээх, ымыылаах салгын куттаах, мутукча мүөтүнэн дыргыйар кинигэ хайдах толкуйданан айыллыбытын туһунан «Бичик» кинигэ кыһатын дириэктэрэ Август Егоров сиһилии билиһиннэрдэ.

Кинигэ ааптара, суруналыыс Евдокия Иринцеева-Огдо Эдьиий Дораны кытта алтыспыт, киниэхэ эмтэммит дьонтон хайдах интервью ылбытын кэпсээтэ, кинигэҕэ үлэлэһиитэ барыта санаа хоту табыллан испитин бэлиэтээтэ.

Дьокуускай куорат баһылыга Айсен Николаев Эдьиий Дораны үбүлүөйүнэн, кинигэ сүрэхтэниитинэн эҕэрдэлээтэ, үөһэттэн айдарыылаах, сүдү дьоҕурдаах улахан дьон саха омукка баалларыттан киэн туттарын эттэ.

Ол кэнниттэн кинигэ 55 геройа сценаҕа тахсан, олох араас ыар түгэнигэр түбэһэн ыктарбыттарын, барар сирдэрэ баҕана үүтэ, кэлэр сирдэрэ кэлии үүтэ буолбутугар Эдьиий Дора күн-ый буолбутун, көмөлөспүтүн кэпсээтилэр, сиргэ тиийэ сүгүрүйдүлэр, махтаннылар.

Тыл эппиттэр бары Эдьиий Дора сүдү дьоҕурунан бар дьонун араҥаччылыы, арчылыы сылдьарын бэлиэтээтилэр.