Николай Туприн айар үлэнэн дьарыктаммыта 20 сыл буолла. Кини бастакы хоһоонун доҕоругар, Анаабыр биир талааннаах уолугар Көстөкүүн Шубиҥҥа анаабыта. Онтон ылата «Кэһиилээх Уола» диэн псевдонимынан үгүс элбэх хоһоону айда, уочаркалары, үһүйээннэри суруйда, 4 кинигэни бэчээттэтэн таһаарда. Кэһиилээх Уола суруйар тиэмэтэ – хотугу киһи олоҕо-дьаһаҕа, төрөөбүт хотугу дойдутун кэрэ айылҕата, хоһуун, мындыр өйдөөх дьоно-сэргэтэ. Кини хоһоонноругар таба – норуотун дьылҕата буоларын бигэргэтэр. Маны таһынан, кини хас да хоһоонугар музыка айыллан, уостан түспэт ырыа буолан ылланар.

«Санаа ыллыгын сүрэхтэргэ саҕан» саҥа кинигэтэ Дьокуускай куоракка «Сайдам» кыһаҕа 500 ахсаанынан бэчээттэнэн таҕыста. Кинигэҕэ ийэ тылы, айыы үөрэҕин, итэҕэли тутуһан олоҕу сиэрдээхтик олоруу туһунан суолталаах кэлэр көлүөнэтигэр, ыччаттарга тиэрдэр, ыра санаатын түмпүт хомоҕой тыллаах хоһоонноро, табаһыт, булчут биир дойдулаахтарын, үөлээннээхтэрин туһунан ахтыылара, үһүйээннэрэ түмүллэн киирдилэр.

Николай Лукич хоһоонноро, суруйуулара кумааҕыга түһэн күн сирин көрөллөрүгэр көмөлөспүт дьонунан кини биир дойдулаахтара Ю.П.Лыткина уонна Г.В.Петрова буолаллар. Оттон кинигэтэ бэчээттэнэн тахсарыгар үбүнэн улуус дьаһалтата өйөөтө. Николай Лукич дьоро киэһэтигэр күүс-көмө буолбут дьонугар махтанна. Бу биэчэргэ кини хоһоонноругар айыллыбыт ырыалары оҕолор ыллаан дьон сүргэтин көтөхтүлэр.

Ытыктыыр киһибит Николай Лукич, айар суолун алгыстаннын! Инникитин өссө да хомоҕой хоһоонноргун, үтүөҕэ сирдиир суолталаах суруйууларгын киэн эйгэҕэ таһаара тур!