Россия биир бас-көс суотабай оператора «Мегафон» биһиги өрөспүүбүлүкэбитигэр үлэлээбитэ номнуо онус сылыгар барда. Уон сыллаах үбүлүөйүн чэрчитинэн, Дальнай Восток регионнарын сорох куораттарын иннигэр түһэн, бу сайын Дьокуускайга 4G+ төрдүс көлүөнэ ситимин үлэҕэ киллэрбитэ. Онон билигин куорат олохтоохторо сайдыылаах омук дойдуларыттан хаалсыбакка, түргэн, үрдүк хаачыстыбалаах Интернетинэн хааччылыннылар. Чугастааҕы кэмҥэ саҥа ситиминэн өрөспүүбүлүкэ промышленнай куораттара хабыллыахтаахтарын туһунан Андрей Левыкин кэпсээтэ.

Хампаанньа Россияҕа аныгы үйэ 3G ситимин бастакынан үлэҕэ киллэрэн, күн бүгүн мобильнай Интернетинэн хааччыйыыга инники күөҥҥэ сылдьар. Оттон икки сыл анараа өттүгэр Россияҕа бастакынан LTE (Long Term Evolution) коммерческай ситими үлэҕэ киллэрбиттэрэ. Билигин бу ситим өҥөтүнэн Россия 54 регионугар 1,4 мөлүйүөн кэриҥэ киһи туһанар.

Аны сотору кэминэн Россия үрдүнэн суотабай сибээс тарыыптара намтаары тураллар. Дальнай Восток регионнарыгар төлөбүр сыыйа намтыахтаах. Бу барыта күрэстэһии баар буолбутуттан тахсарын этэн туран, билигин өссө атын регионнарга ТЕЛЕ2 оператор үлэлээн эрэрин иһитиннэрдэ. Кырдьык даҕаны, билигин дойдубутугар үс улахан суотабай оператор үлэлии олорор. Клиеннэрин ахсаанын сүтэрбэт туһуттан сыаналарын түһэриэхтэрин, хаачыстыбаларын үрдэтиэхтэрин наада. Бу -- ырыынак сокуона.

Суотабай хампаанньа клиеннэрин ахсаанын элбэтэр туһуттан саҥаттан-саҥа суоллары тобулар. Ол курдук, «мегафоннар» сахалыы саҥарбыттара быданнаата. Өскөтүн туһанааччы наадатын быһаарсарыгар, мантан нууччалыы да, сахалыы да сүбэни-аманы ылыан сөп.